Box Office-ah 'Thunderbolt' in hma a la hruai zel

North American Box Office-ah Disney leh Marvel kutchhuak anti-hero film 'Thunderbolt' chuan a kar hnihnaah hma a la hruai zel. Hetih lai hian critics lam chuan beisei a pha lo niin an sawi ve thung.

A kar hnihnaah 'Thunderbolts' hi theater 4,330-a pek chhuah a la ni a, mahse tlangzarh kar aiin ticket sale hi 53% in a tlahniam a, USD mtd 32 a la lut. Beisei a phak lo chungin review leh audience score-ah erawh a hmu ṭha hle thung. North America-ah USD mtd 128.5 hmu chhuak tawhin, khawvel pumah a sum lak luh hi USD 272 a tling tawh. Mahse he film siamna atan hian USD mtd 180 sen a nih bakah, market atan USD mtd 100 sen a ni bawk a, hlawkpui tur chuan USD mtd 360-450 vel tal a lak luh a ngai dawn a, hei vang hian a chet ṭhat chhunzawm viau a la ngai hle. MCU movie zinga sum la lut tlem pathumna a ni mek a, mahse a la danglam chhoh erawh a rinawm.

David Harbour, Sebastian Stan, leh Florence Pugh-te channa 'Thunderbolts' hi May 2 khan theatre-ah pek chhuah ṭan a ni.

Pahnihnaah hian horror film Warner Bros. kutchhuak 'Sinners' rawn lang lehin, kar li chhung chart-ah a lanna a ni tawh. Kar liam ta chhung khan theater 3,502-ah pek chhuah leh niin USD mtd 22 a lak luh belh leh a ni. Video game adaptation 'A Miniecraft Movie' chu No 3-ah awmin kar ruk chhung Top 10-ah a lang thei a, USD mtd 7.7 a lut leh thei a ni. USD mtd 6.7 la lutin 'Accountant 2' chu No 4-ah a lang chhunzawm a, budget tlemte hmanga siam horror film 'Clown in a Cornfield' chu tih chhuah a nih karah USD mtd 3.6 la lutin No 5-ah a rawn lang ve bawk.