Last 16-ah Zverev a lut

Italian Open khelh mekah champion lai Alexander Zverev chuan Vilius Gaubas hnehin last 16 a inhlangkai a, a nomawi kawl lai humhim turin kawng dik a zawh zel.

German tlangval Zverev tan Gaubas lakah harsatna lian tham a awm lo, qualifying paltlanga inlan lakah hian gam li chauh a hloh a, nuamsa tak 6-4, 6-0 in hnehna a chang.

Zverev hian a match lehpekah chuan Arthur Fils a hmachhawn dawn. Inkhel dangah Fils hian Stefanos Tsitsipas chu 2-6, 6-4, 6-2 in a lo hneh ve thung a, player ṭha hneh thei a nih avangin hmachhawn a awlsam dawn lo.

Champion lai Zverev chuan, "Thli a thawt avangin ball kal dan a danglam deuh a, mahse harsa lutuk loin ka insiamrem thei hram. Fils lakah chuan fimkhur lehzual zawka ka khelh a ngai dawn," tiin a sawi. French Open inbuatsaihna a nih avangin a ngaipawimawh hle bawk.

Inkhel dangah Daniil Medvedev chuan Alexei Popyrin 6-4, 6-1 in a hneh a, kum dang aiin clay court-ah result neih ṭhat a tum ang. Tualchhung tlangval Lorenzo Musetti pawhin Brandon Nakashima 6-4, 6-3 in a hneh a, a match lehpekah chuan Medvedev nen an inkhel ang.

Seeded pathumna Carlos Alcaraz chuan nimin zing khan Laslo Djere a hmachhawn a, Spanish star hian 7-6 (7-2), 6-2 in hnehna a chang a, last 16-ah Karen Khachanov a hmachhawn leh dawn a ni.

Clay court inelna lian ber French Open hma chuan Italian Open bak hi tournament dang an khel dawn tawh lo. Chuvangin Grand Slam inbuatsaihna a nih avangin nomawi chawi bakah khelh ṭhat tluan a pawimawh hle a ni.