Ronaldo awmna Al Nassr an champion dawn lo

Cristiano Ronaldo khelh mekna Al Nassr chuan tun season atan Saudi Pro League title an la dawn lo tih a chiang ta - Pathianni zan khan Al Ittihad chuan Al Feiha 3-0 an hneh a, point 74 hmuin Al Nassr tana champion beseina an ti tawp nghal bawk.

Al Nassr hian point 60 hmuin pangana an ni mek a, nizan khan Al Akhdoud an hmachhawn. League nomawi an beiseina a tawp bakah hian AFC Champions League Elite khel tura an beiseina pawh a derthwng rih bawk a ni.

Saudi Pro League aṭang hian pakhatna leh pahnihna te chuan AFC Champions League Elite League stage an khel nghal ṭhin a, palina chin chuan qualifying an khelh a ngai thung. Match khelh hmabak an la neih hoah Ronaldo leh a ṭhiante tan chetsual a remchang tawh lo.

Al Nassr an champion hnuhnung ber chu 2018-19 season kha a ni a, a hnu lamah an la champion leh lo. A hnu lamah Al Hilal chu vawi li champion in Al Ittihad chuan ṭum khat nomawi an chawi ve thung - Ronaldo an neih hnuah pawh Al Nassr duh leh beisei a la thleng thei rih lo tihna a ni.