Inter chak zanah Napoli chak zo lo

Serie A champion tuma inum chuan a vawr tawp a thleng chho mek. Pathianni zan khan champion lai Inter Milan chuan Torino 2-0 a hnehin an title kawl lai humhim an la tum chhunzawm.

Inter Milan an chak tih hre sa chungin Napoli an inlan a, coach ṭha Antonio Conte enkawl Naples club hi an mikhual Genoa nen 2-2 in an inhnehtawk a, point hnih an hloh ṭhen a ni.

Italian football inelna sang ber hi season tawp hmain match khelh hmabak pahnih chiah a awm tawh. Hmahruaitu Napoli hian point 78 an hmu a, pahnihna Inter aia an sanna chu point khat chauh a ni, champion tur a la chiang lo.

Inter an chak

Inter Milan tan nomawi humhim tur chuan chak loh a thiang tawh lo a, point hloh ṭhen pawh a rem tawh lo. Champions League khel chau ni mah se Simone Inzaghi chuan player ṭha rual a chhawr.

Minute 14-na lekah Nicola Zalewski chuan yard 25-a hla aṭanga goal mawi khungin Inter hma a hruai pui a, second half tir lamah Torino keeper Vanja Milinkovic-Savic chuan Mehdi Taremi ti tlu in penalty a chawi.

Penalty pettu Kristjan Asllani tan khung turin harsatna a awm lo, anmahni goal venghim zuiin khual mualah point thum hlu tak an hlawh chhuak a, an beiseina meichher chu tih alh a ni zui bawk.

Inter coach Simone Inzaghi chuan, "Ka theihtawp a ṭhain season an hmang zo ang a, chumi hnuah eng nge lo thleng chu kan hria ang. Kan hmabak pahnihah hian kan chak a nih chuan nomawi kan la chawi theih ngei ka ring," tiin Napoli chu an la chetsual a ring.

May 18, Pathianni zanah Inter Milan hian Champions League khelh phak beisei zinga mi Lazio an mikhual dawn a, tun season an league match hnuhnung ber atan Como an la lenchilh dawn bawk a ni.

Napoli an chelh

Serie A nomawi chawi turin Napoli dinhmun a ṭha hman hle a, mahse Genoa lakah point hnih an hloh avangin atawp thlengin inthlahdah thei an ni dawn lo, an chetsual leh zeuh chuan Inter Milan hnungah an awm daih thei.

Antonio Conte-a'n, "Kan hmabak pathum hi a hautak dawn," tiin a sawi lawk a, a sawi dikna kan hmu nghal. Romelu Lukaku leh Giacomo Raspadori te hmangin vawi hnih hma hruai mah se an humhim thei lo.

Napoli goalkeeper Alex Meret-a'n anmani lamah a ti lut palh a, hun tawp dawnah mikhual Genoa tan Johan Vasquez chuan an goal hnihna khung bawkin, team pahnih ten point khat ve ve in an insem a ngai ta a ni.

Italian manager Conte chuan, "Football hi chuang hlimna min thlen rual hian lungngaihna pawh in thlen tel ṭhin, tun ṭum kan inkhel tawp lamah pawh kan hmu. Mahse, engkim hi kan kuta awm a la ni a, thlauh loa vawn tlang kan tum ang," tiin a sawi.

Napoli hian tla thei dinhmuna la ding Parma an la lenchilh dawn bakah Cagliari an la tlawh dawn a, season tawp dawnah chuan club lian lo zawkte pawhin an him theih nan thapui an thawh tawh ṭhin avangin Naples club tan pawh fimkhur a ngai dawn hle.