LBS Suzuki CYMA Football Armed Veng South leh Sialhawk an chak

LBS Suzuki 22nd Inter Branch YMA Football Tournament 2025-ah champion rinkai zinga mi Armed Veng South-in nimin khan Dawrpui 5-0 in an sawp. Aizawl khaw pawn aṭanga team langsar Sialhawkin harsatna nei loin Lungchhuan an hneh ve bawk.

Armed Veng South hian first round-ah Vangtlang an hmachhawn a, 3-1 in an chak a, an chak danah inchhuang thei an ni lo. Nimin inkhelah erawh an insiamrem tawh tih a lang a, Johny F. Malsawmtluanga hmanga goal an khung hma avangin nuam sa takin hnehna an chang.

Dawrpui hian Chanmari FC winger Malsawmsanga kawl mah se Armed Veng South tlarhnung a phui ṭha a, goal an chhuah lo. Johny-a'n goal hnih a khung bakah season liam taa MPL khel pahnih J. Lalbiaklian (2) leh Richard Lalramnunpuia ten an khung belh bawk.

Nimin inkhel dangah Saitual Venglaiin Kharzawl Bilkhawthlir laka hnehna chang turin vanneihna an mamawh a, minute 87-naah Lalbiakthanga hmangin siphurh an sut hram a, penalty shootout-ah 5-4 in an vannei ta zawk. Aizawl FC midfielder Zothanpuia chu Saitual Venglai tana inlanin man of the match-a than a ni.