Europa League final khel tur Man United leh Tottenham te an chak lo

Manchester United leh Tottenham Hotspur ten Europa League final hial thleng mah se Premeir League-ah erawh dawl zawrin an zawr. Pathianni zan khan Man United-in an mualah West Ham United 2-0 in an hneh lo a, hetiang zat bawk hian Spurs pawhin an mualah Crystal Palace an hneh lo.

Ruben Amorim-a hote hian match 36 aṭangin point 39 an hmu a, 16-naah an awm. Man United hi che chhe viau mah se an hnuaiah Spurs an la awm cheu. Ange Postecoglou hote hian point 38 an hmu a, 17-naah an awm thung. Man United leh Spurs hnuaia club la awmte chu relegate tur Ipswich Town, Leicester City leh Southampton te chauh an ni.

United an mualpho

Man United-in Premier League-ah chak dan an theihnghilh tawh a, Old Trafford-ah pawh a hman hman an chak ta emaw tih mai tur a ni. Pathianni zanah pawh table hnuai lama mi leh a zawna league match vawi riat chak hmel hmu tawh lo Hammers an hmachhawn chungin 2-0 in an chak lo.

Mikhual team tan Tomas Soucek leh captain Jarrod Bowen ten goal an khung a, Man United-in an chhanletna an nei lo. Amorim-a'n Europa League final thlir tel bawk mah se bul ṭantu zingah final-a Spurs laka bul ṭan tura ngaih player panga bul a ṭantir tho.

Portuguese manager hi player inhliam loh nan fimkhur viau mah se defender Leny Yoro chu hliam vangin lakchuah a ni a, a na tuar dan enin final-a a chhar theih a rinawm lo. Yoro hi Athletic Bilbao an sawp ṭuma a khelh ṭhat avangin Amorim-a tan channa nasa tak a ni ang.

Amorim chuan, "Kan dinhmun hi a zahthlak. Thil ngaihtuah tur tam tak a awm. Mi ṭhahnem tak chuan Europa League final an thlir a, kan buaina hi final piah lam a ni. Keimah bakah club leh team te hi kan inthlak a ngai. Hetiang anga awm kan duh tawh loh chuan nipuiah kan huaisen a ṭul dawn," tiin a sawi.

Man Unite hian 1930-31 khan point 29 hmuin an relegate a, hetih lai hian match 42 khelh tur a awm. Tun ṭum hi an result chhiat leh ber ṭum a ni a, Europa League final an khelh dawn avangin Champions League khelh theihna kawng a la inhawng thung.

Spurs tan record thar

Man United ang thoin Tottenham pawh an che chhia a, record thar an siam. An record siam erawh a duhawm lo, Premier League season khatah a vawi 20 nan an chak lo a, an hneh loh chu Crystal Palace an ni. FA Cup final khel tur Palace tan hian Eberechi Eze-a'n goal hnih a khung.

Spurs hian 1991-92 season khan vawi 20 an chak lo tawh bawk a, match hnih khelh hmabak an la neih avangin English top flight bikah pawh record thar duhawm lo tak la siam thei dinhmunah an ding. Spurs boss Ange Postecoglou chuan, "Palace nen khan khelh ṭhat lai kan nei lo. Kan buaina ber erawh player kan thlak hnem vang a ni. Spurs khelh dan tur angin kan khel lo a, kan result-ah kan lungawi lo," tiin a sawi.

Premier League-ah Spurs che chhe mah se Postecoglou hote hi nomawi chawi thei dinhmunah an la ding a, Australian manager hian nomawi chawi ngei tumin Bodo/Glimt hnehtu aṭangin player pariat ngawt a thlak a ni.