LBS Suzuki CYMA Football: Tlai dar 2:30-ah Dinthar Vs Khawlailung

LBS Suzuki 22nd Inter Branch YMA Football Tournament 2025-ah team ṭha a inlar ṭan a, vawiin chawhnu dar 2:30 hian Dinthar leh Khawlailung te Muallungthuah an inkhel dawn. Football thiam veng tia sawi ṭhin Dinthar hi an vawi khat khelhnaa tla thei an ni.

Dinthar hian kum 1990 leh 2002 te khan CYMA Football nomawi an chawi tawh a, team ṭha zinga mi ni reng ṭhin mah se tun hnaiah erawh an tla hniam. Mahse, Dinthar hian football-ah indinthar leh an tum a, an veng club Dinthar FC pawhin season thar aṭangin MPL an khel leh dawn.

MPL hmasa ber champion thei veng Dinthar hian goalkeeper ṭha John Lalruatfela bakah Aizawl FC midfielder Lalawmpuia Sailo te bakah tun hmaa an rinrawl Samuel Laltlanthanga te an la awm a, team ṭha pawl tak an ni. Mahse, an khingpui tur Khawilailung hi Aizawl khaw pawn team ṭha ber zinga mi an ni.

Khawlailung hian K. Vanlalhriatzuala, Lalhunruata leh tawnhriat nei ṭha R. Lalthantluanga (Lalmama) te an kawl a, Dinthar hneh an inbeisei ang. Muallungthu-ah hian Aizawl khaw pawn team ṭha tura ngaih Hnahthial Electric pawh an inlan dawn a, Zanlawn lakah an theihna phochhuah an tum ang.

RG Stadium-ah pawh inkhel hmuhnawm tur a awm. Chawhma dar 10:00-ah Tlungvel Vengthar leh Kawnpui Venglai te an inkhel dawn a, Kawnpui buk a rit zawk. Chite Vengin an mualah Ramhlun Sports Comp 3-0 in an hneh tawh a, vawiin hian RG Stadium-ah Kelsih lakah fiahna an hmachhawn dawn. Hualngohmun leh Zemabawk North hnehtu Mualpui, ITI inkhel tur pawh hi en tlak viau tura ngaih a ni.

1st Bn MAP Ground, Armed Vengah College Veng leh Mission Vengthlang te an inkhel dawn a, chak tur hriatthiam a har a, inkhel hmuhnawm tura ngaih a ni. Vawi thum champion tawh Electric Vengin Muanna Veng an hmachhawn dawn a, tun ṭumah hian Electric Veng hi team ṭha ni lo mah se Muanna Veng hneh tur chuan an la ṭha tawk ang.

Chite Veng Playground-ah Zobawk Vengthar an inlan dawn a, an khingpui tur Upper Republic hi naupang rual an ni. Serchhip Vengchungin Bawngkawn South an hmachhawn dawn a, hna harsa tur niin a lang lo. Inkhel hmuhnawm ber tur erawh Khawzawl Vengthar leh Hlimen te hi an ni a, Khawzawl Vengthar hi team ṭha zawka ngaih an ni.