Celtics an chak ve ta

Rinkai ni mah se a tir lamah Boston Celtics an che fuh lo a, tunah chuan chak ni hmel a hmu ta. Nimin zing inkhelah Celtics hian New York Knicks chu 115-93 in an hneh.

Knicks hian game hmasa pahnihah hnehna an lo chang tawh thung. NBA Eastern Conference playoff semifinal khelh laiah Knicks hian 2-1 in series hma an hruai mek, best of seven hmanga chak zawk zawn tur a nih avangin inlehthal thei erawh an la ni.

May 13, Thawhlehni zing dar 5:00-ah game 4 an khelh leh dawn, conference final lut tur chuan a tlem berah vawi li tal an chak a ngai a, team pahnih tan insiamṭha turin hun a la awm.

Knicks tana point 27 neitu Jalen Brunson chuan, "2-0 a nih avang khan kan dinhmun a himin a ṭha tihna a la ni lo, inelna hi a la inṭan dawn chauh zawk a ni tih kan hriat a ngai. Game 3 kan khelh danah kha chuan chak phu lo zawk kan ni," tiin a sawi.

Western Conference semifinal lamah Minnesota Timberwolves chuan Golden State Warriors chu 102-97 in an hneh a, anni pawh hian best of seven series khelh laiah 2-1 in hma an hruai ta chiah.

Timberwolves coach Chris Finch chuan, "Holam tak taka ball hloh ang kha kan nei lo. A hunah tak zel bastket kan nei ṭhin bawk, tihsual neih tlem hi chak nan a pawimawh," tiin a sawi.

May 13, Thawhlehni zing dar 7:30 hian game 4 an khelh leh dawn. Hliam vanga chawl mek Stephen Curry chu a la inkhel thei lo chhunzawm dawn niin a lang a, an inhnehtawk chho zel a nih chuan game 6 velah a inlan hman a rinawm.

Warriors coach Steve Kerr chuan, "Timberwolves lam kha an inveng thiam em em a, ball an hloh tlem bawk. A bik takin quarter hnuhnung ber kan khelh lai khan an inveng thiam zual, kan match lehpekah chuan a danglam ka beisei," tiin a sawi.