Sorloth-a'n goal li a khung

Atletico Madrid chuan Inrinni zan khan La Liga inkhelah Real Sociedad chu 4-0 in an sawp a, inkhela goal lut zawng zawng hi Alexander Sorloth-a khung vek a ni!

Kum 29 mi Sorloth hian hattrick siam turin hun a mamawh rei lo hle. Minute sarihnaah goal khung ṭanin, minute 11 a nih chuan hattrick a siam fel der tawh a, inkhel ṭan aṭanga minute 11 chhungin hattrick a siam - La Liga-a hattrick siam rang ber record a ni.

La Liga-ah hian inkhel hamrik a rik aṭanga chhiar ṭan a, hattrick siam rang record hi Valencia striker hlui Edmundo Suarez (1941) leh Barcelona midfielder hlui Carles Bestit (1929) ten an chelh reng a, Sorloth chuan he record hi a khum a, anni ai hian minute liin a siam hma zawk.

Sorloth hian a duhtawk mai lo, hrem vanga Julian Alvarez inlan theih loh zanah zo takin mawhphurhna a la a, minute 30-naah a goal lina a khung zui - second half ṭantirah bar a pet per mah mah!

Norwegian striker hi tun season-ah Atletico tana La Liga-a goal khung tam ber a ni ta a, match 32-ah goal 17 a khung. Inelna hrang hrangah match 47 khel tawhin, goal 21 a khung a, assist vawi hnih a nei.

Premier League-a Crystal Palace tan pawha lo khel tawh striker hian tun season ṭan dawn khan Atletico hi Villarreal aṭangin a pan a, a man zat hi euro maktaduai 32 a ni.

Season hmasa khan Villarreal tan match 41 khelin goal 26 a khung a, nikum May khan Villarreal tan hian May thlaah vek, match khata goal li khung a nei tawh - champion Real Madrid nen 4-4 in an inhnehtawk.

Atletico hian hnehna chang mah se, champion beiseina erawh a awm tawh lo a, tun season chu nomawi chawi loin an mangṭha dawn tih a chiang tawh.

Hetihlai hian season hmang chhe tak Sevilla chuan 3-2 in Celta Vigo an ngam lo leh ta a, league match riat zet chu a zawnin an chak zo lo tawh. Celta Vigo tana Ilaix Moriba-a goal hmahruai chu Sevilla hian Nemanja Gudelj (penalty) hmangin an chhanglet. Mahse, Oscar Mingueza leh Borja Iglesias ten Celta Vigo tan khung lehin, hun pek belh minute riatnaa Enrique Salas goal khungin Sevilla a chhan thei lo.

Inrinni zan khan Sevilla fans ṭhenkhat thinrim chu club training ground-ah an lut a, player-te chu an him zawk nan club hmunah zan an riah thu Sevilla thuneitute chuan an sawi.