Anastasia leh Sihphir an chak

EverHome Pro Volleyball League khelh laiah, Inrinni zan khan Anastasia Electric Veng chuan Khawbel chu 27-25, 25-20, 23-25, 25-22 (3-1) in an hneh a, match li an khelh tawh chinah vawi hnih chakin semifinal an beiseina a sang ta hle.

Anastasia tan hian Karthik Madhu-a'n point 35 hlak chhuakin a thawhhlawk hle a, point 20 neitu Laldinsanga a thawh hlawk hle bawk - pathumna dinhmun luah mekin, tun hma lama champion tawh an nihna chu hun pawimawh laiah a lang.

Zirtawpni zan khan Sihphir chuan Thutak Nunpuitu Team lakah 25-22, 25-16, 25-21 (3-0) in hnehna an chang a, point ruk hmuin palina dinhmun an luah - khelh zat inangah TNT nen an point a inzat a, palina china awm tumin an inum zui ang.

Zanin hian LPS Arena Falkland Vengah khelh chhunzawm a ni leh dawn, dar 8:00-ah champion lai Hunthar leh tun season hmahruai mektu Tuichangral an inhmachhawn dawn - Hunthar tan an zahawmna humhim turin chak a pawimawh ang.