Tudor-a'n ngaihdam a dil

Inrinni zan Serie A inkhelah Juventus chu Lazio nen 1-1 in an inhnehtawk a, hun pawimawh laia point an hloh avangin Old lady coach Igor Tudor chuan anmahni ṭan tute lakah ngaihdam a dil.

Stadio Olinpico-a inkhelah Randal Kolo Muani-a goal hmangin Juventus hian hma an hruai, minute 60-naah Pierre Kalulu chu hnawhchhuah niin, an defender tel loin Juve hian hun rei tak an khelh a ngaih phah.

Hun rei tak chhung chu Juventus hi an inveng thei, mahse hun tawp dawnah Matias Vecino chuan goal khungin Lazio tan point a hlawh chhuak a, team pahnih hian match 36 aṭangin point 64 ve ve an hmu.

Juve manager Tudor chuan, "Mipui au thawm kha ka hria a, kan goal venhim a ngai tih pawh ka hria. Goal venhim tumin player awh kan siksawi, kan duh ang thlap erawh chuan thil a thleng ta lo.

"Champions League khelh tuma inum boruak san lai tak a ni a, point thum kan hmu lo kha kei ngei pawhin a pawi a ti. Result vanga lungawi lote chungah ngaihdam ka dil, kan hmabak pahnihah ṭha lehzual zawkin kan khel ang," tiin a sawi.

Inkhel dangah AC Milan chuan Bologna 3-1 in an hneh thung a, point 60 chauh an la hmuh avangin an tan UCL beisei san ngam a harsa tawh ang.