LBS Suzuki CYMA Football 2025: Armed Veng South, Saitual Venglai leh Sialhawk inlan hun

LBS Suzuki CYMA Football 2025 second round chu vawiin hian RG Stadium leh Chite Veng Playground-ah khelh chhunzawm a ni dawn. Champion rinkai zinga mi Armed Veng South bakah team ṭha tura ngaih Saitual Venglai leh Sialhawk te a nilan dawn.

RG Stadium-ah Maubawk leh Sesawng, CTI ten bul an ṭan dawn. Sesawng, CTI hian match hmasa berah Luangmual 2-1 in an hneh a, team ṭha ti tura sawi ni lo mah se Maubawk lakah an buk a rit hret zawk.

Armed Veng South-in match hmasa berah Vangtlang 3-1 in hneh mah se inkhel an thunun thei lo. Vangtlang fitness a ṭhat bakah tharum an ngah avangin Armed Veng South an talbuai. Vawiinah erawh AVS hian tharum ngah lo zawk tura ngaih Dawrpui an hmachhawn dawn. Mahse, Dawrpui hian Chanmari FC winger Malsawmsanga te an neih avangin chesual ve thei tho an ni.

Chawhnu dar 2:30-ah Phulpui leh Tlungvel Venghlun te an inkhel dawn a, team intluk tawk tura ngaih an ni. Tlungvel Venghlun hian an match hmasa berah Kawrthah Hmar Veng chu 2-1 in an hneh a, Phulpui erawh an vawi khat inlanna tur a ni thung.

Chite Veng Playground-ah Saitual Venglai leh Kharzawl Bilkhawthlir ten bul an ṭan dawn. MFA Cup-ah Saitual aṭanga team chhuak an zahpuiawm lo a, Aizawl FC midfielder Zothanpuia'n a ho dawn bawk avangin tun inelnaa en châkawm zinga mi an ni.

Kum 2012 inelnaa final thleng thei Chanmari West pawh an inlan dawn a, mahse tun hma angin an ṭha tawh lo. Vawin chhun dar 12:15 hian Sailam an hmachhawn ang. Inter Village Football 2022 finalist Sialhawk an inlan dawn a, R. Laldanmawia'n a la ho dawn bakah Crespo Vanlalhriatpuia te an neih avangin harsatna nei loa Lungchhuan paltlang tura ngaih an ni.