City chak loh laiin Villa chak - a 'hot' chho!

Premier League-ah champion leh relegate hre hma mah ila, Champions League khel tur erawh a la chiang thei lo a, English football hmuhnawmna chu belhchhahin a awm zel.

Inrinni zan inkhelah Manchester City-in hnehna an chang zo lo a, tla tawh Southampton chu 0-0 in an inhnehtawkpui! City chak loh thu hre sain Aston Villa an inlan zui a, 1-0 in Bournemouth an hneh.

Aston Villa tan Ollie Watkins chuan inkhela goal awmchhun a khung a, pasarihna aia hniam an nih theih tawh loh avangin UCL khel phak lo pawh ni se, Europa Conference League chu an khel ngei ngei dawn.

Match hnih chiah khelh tur awm tawhah City aiin Villa hi point hnih chiahin an hniam a, nizanah Newcastle United, Chelsea leh Nottingham Forest te an inlan a, an result kan hre hman lo - UCL khelh beisei vek an ni.

City an bil

Tun season Premier League aṭangin Southampton an tla hma ber a, goal 82 ngawt chhuahin, anni aia chhuah hnem an awm lo bawk - statistics aṭanga teh chuan City-in harsatna nei loa hnehna an chan mai a rinawm.

Mahse, St Mary's Stadium-ah City an hmuhnawm lo a, tlarhma an hriam tawk lo. Match sarih zet a inkhelh loh hnuah Erling Haaland pawh lo kir leh tawh mah se, a inkhelh tam loh a hriat a, minute 91-naah chance a nei tih loh chu shot a nei lo.

Pep Guardiola enkawl team an ni ta lo em ni chu aw, tih tur khawpin City player-ten tlarhnung inremphui Saints an rum ṭhaih hleithei lo a, kartawpah FA Cup final an khelh zui dawn avangin City tan insiamṭhat a ṭul.

City hian Saints hneh ngat se, nizana inkhel Arsenal lehpelin, pahnihna dinhmun luah thei tur an ni a, mahse, pathumnaah an awm chhunzawm. Nizana Newcastle leh Chelsea inkhel result-a zirin pathumna aia hniamah an tla leh thei bawk.

A thlawn mai maw

City hian chance nei lo tawp an ni lo a, mahse, an chance neih chhunah pawh an chhawr lo - defender Manuel Akanji chuan corner aṭanga ball kal chu uiawm takin a tauh goal lo a, Bernardo Silva khung ngei tur nia lang chu Saints captain Jack Stephens chuan goal line aṭangin a lo clear hman bawk.

Hun tawp hnaih lamah Saints goalkeeper Aaron Ramsdale chuan hna a nei ve leh deuh a, Ruben Dias-a khung ngei tur nia lang chu a dansak a, Omar Marmoush chuan crossbar a tihper thung.

A tawpah chuan team pahnihin point khat an insem a, record duhawm lo nih rual thei dinhmuna ding hman Saints an thaw huai ang. 2007-08 season khan Derby County chuan point 11 lek hmuin, EPL-a point hmu tlem ber record an siam a, mahse, Saints-in City an chelh avanga point 12 hmuin, Derby record chu an nih rual dawn ta lo.

City boss Pep chuan, "Inkhel harsa tak a ni a, chance kan nei ngei a, mahse, kan khung thei tlat lo. Southampton khan tlarhnung ven leh hun khawhral bak an ngaihtuah lo a, point kan hlawh chhuak ta tho a ni," a ti a, an kutah engkim a la awm thu a sawi bawk.

Villa an chak

City chak zawh loh thu hra sain Villa an inlan a, Unai Emery naute hian an hun ṭha bawhpelh an tum lo. Khualmualah Cherries chu 1-0 in an hneh a, top five-a season khar turin kawng dik an zawh zel.

Villa tan Ollie Watkins chuan first half hun pek belhah inkhela goal awmchhun a khung a, Villa tan Premier League-a goal khung hnem ber record a siam nghal - match 182-ah goal 75 a khungsak tawh.

Watkins hian April-a Newcastle United (4-1) an sawp ṭum khan Gabriel Agbonlahor record chu nih rualin, Villa tana EPL-a goal khung hnem ber a lo ni tawh a, May thlaah record chu amah chauha chelh turin a khung belh leh ta.

Tun season-a match 52 a khelha goal 17 khungtu Watkins hian Marcus Rashford luh hnuah khelhna hmun a chang meuh lo a, mahse, Manchester United aṭanga loan-a an hawh forward inhliam hnuah hmun pawimawh chang leh zuiin, Villa tana player ṭangkai a nihzia a pholang.

Inkhel hmuhnawm

Villa tan Marco Asensio pawhin chance duhawm nei mah se, post a tihper a, Cherries keeper Kepa Arrizabalaga chuan khawvela keeper man to ber a lo nih tawh chhan pholangin, Boubacar Kamara leh Matty Cash khung ngei tura lang pawh a dansak.

Mahse, Villa hi hun tawp lamah an talbuai teuh hle. Minute 80-naah midfielder Jacob Ramsey chuan ṭul lo takin yellow card pahnihna a hmu a, hun tawp lam minute 10 chu Villa hian kim lo chungin an khel.

Cherries hian a tam zawk nih chhawr vatin chance hlauhawm an nei zui a, mahse, an vanneih zan a ni lo. Villa keeper Emiliano Martinez chuan ṭha zetin Antoine Semenyo-a khung ngei tur ṭha zetin a dansak a, Cash chuan goal line aṭangin a clear hman bawk.

Arsenal an hneh hnuah Bournemouth-in Villa an ngam lo a, Unai Emery naute hian Tottenham Hotspur leh Manchester United an la hmachhawn dawn avangin hmabak a awlsam lo.