Warriors lakah Timberwolves an chak

NBA playoff khelh laiah nimin zing khan Minnesota Timberwolves chuan Golden State Warriors chu 117-93 in an hneh a, best of seven series khelh turah team pahnih hi 1-1 in an inhnehtawk mek a ni.

Minnesota Timber-wolves an chak theih nan Julius Randle chuan point 24 a neih bakah a ṭhiante basket neih tur ṭum 11 a siamsak bawk a, an chakna hnar pawimawh leh langsar a ni.

Randle-a bakah hian Anthony Edwards a langsar, ani hian point 20 a nei. Edwards chuan, "Training laiin a che tla vel kan hmu ṭhin a, kan tan chuan thil thar a ni lo," tiin Julius Randle chungchang a sawi.

Golden State hian an thiampuipa Stephen Curry chu a malpui hliam vangin an chhawr thei lo a, mual sir aṭangin a ṭhiante inkhel a lo en a, chawlhkar khat vel tal chu a chawlh a ngai dawn a ni.

May 11, Pathianni zing dar 6:00-ah game 3 an khel leh dawn a, conference finals lut tur chuan a tlem berah match li tal an chak a ngai a, hmabak an la ngah hle.