Armed Vengin champion zia an chhuah

LBS Suzuki 22nd Inter Branch YMA Football Tournament 2025-ah record nei ṭha ber Armed Vengin player 10-a khel chungin Zemabawk 2-1 in an lehthal a, second round an lut. Vawi nga champion tawh Armed Veng hi second round-ah Saidan Kolasib nen May 15, Ningani hian an inkhel ang.

First round-a inkhel hmuhnawm ber tura ngaih hi beisei lawk ang ngeiin a hmuhnawm a, team nem zawka ngaih Zemabawkin goal an khung hmasa bawk nen inkhel a nung ṭha hle. Chite Playground a zim hret avangin Mohammedan SC captain Zodingliana leh Hyderabad FC midfielder Lalchhanhima Sailo te ball sem a dik tawk lo a, Armed Veng inkhel a nung thei lo.

Armed Vengin inkhel thunun harsat mah se an la hlauthawng lo a, entu mipui lam pawhin chak turah an la inngai zel. Mahse, minute 15-naah Zemabawk defender Gilbert Lalbiaksanga'n hla tak aṭangin freekick ṭha zetin a pet a, boruakah ball a kawi hnuah woodwork perin a goal a, inkhel boruak a nung sawt.

Goal luh hnuah Armed Veng khel nung hret mah se Zemabawk an phur a, Lalramchullova hote an talbuai. Lalawmpuia Khiangte-in ball awm loh hnuah Zemabawk player a nghawk a, referee-in a hmuh chian si avangin hnawhchhuah nghal a ni. Armed Veng ṭantute an lawm lo a, referee erawhin thutlukna dik a siam.

Zemabawkin goal dang khung belhna remchang an nei a, Freddy Lalrinchhana'n ball a lak fuh tawk loh avangin goal-ah a chantir thei lo. Goal ngat chu ni se, Armed Veng an tho chhuak tawh kher lo ang. Ball awm laiin an midfielder Lalbiakhlua (Hlutea) leh Zemabawk forward Freddy te an intibuai a, Armed Veng lamin an khingpui player-te red card hmu turah ngai mah se referee-in yellow card ve ve a pe ta zawk.

Coach Chullova'n halftime a hmang ṭha a, player 10-a khel chung siin second half-ah Armed Veng an khel ṭha sawt. Entu mipui zingah Armed Veng ṭantu an tam bawk avangin Chullova hote tan mahni muala khel ang mai an ni. Second half-ah Armed Veng forward Lalfakzuala'n chance ṭha bik a hlah a, Mizoram Police forward hian chance ṭha dang erawh a hlah nawn lo.

Fakzuala hian minute 53-naah Zemabawk offside trap bumin chiang zetin a pet goal a, goal dang hmuh tur a awm lawk lo. Armed Veng chungnung hret mah se penalty shootout hmanga chak zawk an zawn mai a rinawm ta zawk. Mahse, minute 88-naah substitute K. Lalrintluanga'n a hun ṭha neih chu goal-ah a 'risk' a, Zemabawk keeper a chetsual avangin goal-ah a lut.

Armed Veng an vannei a, chutihrualin CYMA Football-a record nei ṭha ber hi an huaisen zawk avangin Zemabawk lakah player 10-a khel chungin hnehna an chang.