Khawbel lakah Tuichangral an chak

EverHome Pro Volleyball League a hmuhnawm zel a, an match hmasa pahniha an chak hnuah Khawbel chuan ngam loh an tawng - Nilaini zan khan Khawbel hi Tuichangral lakah 25-23, 25-22, 25-20 (3-0) in an chak lo.

LPS Arena, Falkland-ah Khawbelin Rajneesh Singh an dang hneh lo. Tuichangral tan Zomuansanga'n a theihna tak lantirin a che na hle bawk a, point ruk hmuin table hmahruaitu an ni - Khawbel nen an point a inzat.

League inkhel hmasa berah Tuichangralin MVA Cup final-a an hneh loh Thutak Nunpuitu Team an hneh a, mahse, talbuai zuiin Thawhṭanni khan set an lak hmasak hnuah Anastasia Electric Veng an hneh lo a, Khawbel lakah insiam thar lehnghalin, a vawi khat nan champion an tumna an tinung thar leh a ni.

Rajneesh chuan rintlak a nihzia a lantir a, a service ṭha tak chhawr tel bawkin point 31 a hmu a, 13 hloh mah se mimalin a langsar a, a vawi hnih nan Kuriz Player of the Match-a thlan a ni. Zomuana'n ṭha takin a thlawp a, vawi 13 vaw tlain ṭum nga a tisual thung.

Pro Volleyball-a an tel vawi khatnaah Khawbelin boruak an nei hman a, an khelh hmasak vawi hnihah set hloh lo ve vein Hunthar leh Sihphir an hneh zawn. An player pawimawh leh fak hlawh Ashwal Rai chuan team pumpui a chawi kang a, khelh hnihah point 53 hmuin 10 a hloh.

India team-a tel turin Mizo club a chhuahsan a ngai a, ui takin Khawbelin a thlah liam. A aiawh turin India Under 21 team-a khel tawh Tanish Choudhary an la lut a, a hoa an khelh hmasak berah Tuichangral nen inhnehtawk viau chungin set la tur khawpin an el zo lo.

Tanish-a hian ṭum 20 vaw tlain point kua a paih a, Sihphir an hneh tuma che ṭha Lalruatfela Sailo chuan point thum a hmuh aia tam point li a hloh. Rodingpuia'n point khat chiah hlohin ṭum kua a hlap tla a, Mizo player-ten a hma an pha lo deuh.

Khawbel hmaah Tuichangralin a tir aṭangin hma an hruai a, R. Vanlalmawia'n an inkhelh chhungin point khat paihin vawi ruk a vaw tla a, set khatna tawp lamah rang taka ṭum hnih a vuak tlak hnuah 22-16-in an sang.

Khawbelin nawr letin Tanish chuan Vanlalṭanpuia vuak a dansak hnuah Zomuana hlap ṭum hnih a dang zawn a, ama'n vaw tla zui bawkin 22-21-in an inkar an tizim a, 24-23 thlengin an hnaih chho zel. Mahse, kutthlak na tak Rajneesh-a vuak an dang zo lo a, set khatnaah Tuichangral tan point hnuhnung pathum thawk chhuakin deuce ngai lovin an tlang.

Set hnihnaah pawh 20-20 thlengin an intluk a, Rajneesh chuan hlap tla zawnin Tuichangralin an kalsan. 24-22-a hniam zawk an nih laiin Khawbelin hnaih thei turin Ruatfela'n a vaw tla zo lo a, Rajneesh chuan set an lak zawn nan chiang takin a hlap tla ve thung.

Tuichangral tan boruak sangah Uttar Pradesh player a pawimawh a, a hma leh hnunga a awm lai pawhin setter C. Zonunmawia'n ball a pe tam. Set thumnaah Khawhai tlangval Zomuana'n chiang tak takin a vaw tla tel bawk a, Rajneesh chuan a theihna chiang leh zuala lantir telin Tanish chuan vawi hnih a service a la sual a, 21-16-in hma an hruai phah.

Khawbel an hriam tawk lo a, Tuichangral tan Rajneesh chuan ṭha taka khelin an chakna hnar a ni. Zomuana'n an chak theihna point hnuhnung pahnih hlawh chhuakin inhliam Lalbiakmuana tel loin chiang takin hnehna an chang a, chutih laiin mimalin Johan Vanneihsanga'n harsatna a tawk a, point nga hlohin vawi khat chiah a vaw tla a ni.

Tuichangral hian an match lehpekah chuan champion lai Hunthar an tum dawn a, Khawbelin an match hnuhnung lama che ṭha Anastasia an hmachhawn ve thung dawn a ni.