Inkhel a la zo lo - Maresca

Chelsea manager Enzo Maresca chuan Conference League final an la lut chiang lo tih a sawi a, zanin dar 12:30 hian Stamford Bridge-ah Djurgarden an lo mikhual dawn a ni.

Blues hian Swedish club hi an mualah 4-1 in an lo va hneh tawh a, final lut tlang turin an dinhmun a ṭha tawh hle. Djurgarden tan tho chhuak tur chuan a tlem berah goal thum tal an khung a ngai.

Maresca chuan, "Kan intawn hmasak pawh khan minute 70 chhung vel chu ṭha takin kan khel a, a tawp lam minute 20 vel erawh chu kan khelh danah siamṭhat ngai a tam, chuvangin eng pawh a la thleng thei tih a chiang.

"Keimahni khelmualah kan inkhel tawh dawn a, goal li kan khung tawh bawk avangin kan dinhmun chu a ṭha ngei mai. Mahse, hamrik hnuhnung ber a rik hma chuan kan hna kan la zo lo tih hriat a ṭha," tiin a sawi.

Chelsea hi Premier League-ah pangana an ni mek a, season thara Champions League khelh phak ngei tuma thapui thawh lai an ni. EPL an ngaihpawimawh tel a ngaih avangin, zaninah player ṭha ṭhenkhat an chawlhtir a nih pawhin a mak lo ang.

Inkhel dangah Real Betis chuan Fiorentina an tlawh dawn - Spanish club hian an intawn hmasakah 2-1 in hnehna an chang a, Italian club paltlang turin goal chhuah loh a tawk a, thil awlsam tak a nih erawh a rinawm loh.

Real Betis hian Manchester United aṭangin Antony chu loan hmangin an hawh mek a, ani hi boruak siam danglam thei a ni. Brazilian winger hian Real Betis tan inelna hrang hrangah match 20 khelin goal sarih a khung a, a ṭhiante khung tur a siamsak fo bawk.

Zaninah pawh Antony hi Fiorentina tana ven uluk bik ngai tur a ni dawn a, mipui ngaihven a ni bawk ang.