Chawhma dar 10-ahArmed Veng Vs Zemabawk

LBS Suzuki 22nd Inter Branch YMA Football Tournament first round chu vawiin hian khelh zawh a ni dawn a, chawhma dar 10:00 hian Chite Veng Playground-ah Armed Veng leh Zemabawk te an inkhel dawn. Inkhel tur hi first round-a inkhel en châkawm ber a ni a, CYMA Football-a champion ngun ber Armed Veng hi tla nghal ve thei an ni.

Armed Veng hi Lalramchullova'n a enkawl a; ISL, I League leh MPL player-te an inpawlh ṭhat avangin champion tura rinkai an ni pha. Mahse, seeded an nih phak loh avangin Zemabawk nen kher an pawt fuh a, vanduai zawk an awm a ṭul dawn.

Zemabawk hi Samuel Lalrinngheta'n a enkawl Khelo India Under 17-a Mizoram team champion pui tawhtu coach hian MPL Under 17 neih zawh takah Aizawl FC Under 17 a champion pui a, Armed Veng lakah result ṭha neih an beisei ang.

Vawiin hian CYMA Football-a champion tawh team Ramhlun South leh Kanan Veng te an inlan dawn a, tun ṭumah hian champion rinkai ni phak lo ve ve mah se Ramhlun South tan Airfield hneh harsa turin niin a lang lo. Kanan Vengin season thar aṭangin MPL club nei dawn mah se South Sabual an tawh a khirh ve tlat ang.

Inkhel en man hi Rs 20 a ni a, first round leh second round hi live telecast a la nih dawn loh avangin inkhel en duhte tan a hmuna kal chilh mai a ṭul ang.