Del Potro tla nghal

Season chawhnu lama khel ṭha tak Juan Martin del Potro chu Shanghai Masters aṭangin a match hmasa berah vuak tlak a ni. Hetih lai hian Novak Djokovic erawhin a hliam a dam tawh tih lantir nan hnehna a chang nghal thung.

Thawhlehni khan US Open champion hlui Del Potro hi seeded 11-na David Goffin lakah darkar hnih leh minute 18 chhungin 4-6, 6-3, 7-5 in a tlawm. A banrek na vanga kum khat chuang a inkhelh theih loh hnuah Del Potro hi kuminah a lo kir leh a, US Open-ah quarterfinal lutin Rio Olympic-ah silver medal a dawng - Argentina chu Davis Cup final a hruai thleng bawk.

Kum 28-a upa Del Potro chuan, "Hnehna chang turin hun ṭha ka nei a, ka vannei tawk lo thung. Hun rei tak hliam vanga ka chawlh hnuah season duhawm tak ka hmang leh thei hi ka lawm. Tunah chuan hahchawlh ka mamawh a, thla leh a Croatia nen Davis Cup final kan khelh tura hnehna chang ngei turin ka inbuatsaih ang," tiin a sawi.

World number 1 Djokovic-a'n a kiu na vangin China Open a khel thei lo a, Shanghai-ah erawh harsatna nei loin Fabio Fognini chu 6-3, 6-3 in a hneh nghal. US Open final-a Stan Wawrinka a hneh loh hnua a match hmasa bera hnehna chang turin Djokovic hian darkar khat leh minute 45 bak a mamawh lo.

Grand Slam vawi 12 champion tawh Djokovic chuan zawhna chhangin, "Nomawi chawi zat leh ATP ranking hi ka ngaih pawimawh ber a ni lo a, ṭha tak leh nuam ti taka inkhelh hi ka duh leh tum chu a ni. Ka sulhnu ka enlet erawh chuan ka lawm a, ka nomawi chawi tawhten min ti hlim ṭhin - a dang lak belh zel pawh ka duh," tiin a sawi.

Inkhel dangah pawh upset awm nghalin seeded chang phak pahnih David Ferrer (10) leh Richard Gasquet (14) te chu Feliciano Lopez leh Grigor Dimitrov te hneh loin an match hmasa berah an tla nghal.