India-in New Zealand an 'whitewash'

Virat Kohli-a captain-na hnuaiah India-in New Zealand chu test series neih zawh takah 3-0 in an sawp. Series thumna leh hnuhnung ber Indore-a khelhah run 321-in India an chak a, test match hmasa pahnih an lo chak tawh bawk avangin Kohli hote hian mikhual Black Caps chu 3-0 in an hneh a, chu chu whitewash an tih chu a ni.

Thutlukna Huaisen

India hian New Zealand lakah test match hmasa berah run 197-in hnehna an chang a, test match vawi hnihnaah run 178-in a chak leh bawk. Vawi hnih an chak tawh avangin Men in Blue hian test match vawi thumnaah hian draw emaw chak lo emaw pawh ni se series an la tawh dawn tho tho.

India-in bat hmasain Kohli-a'n double century (211) a siam bakah Ajinkya Rahane-a'n run 188 zet a vuakchhuah bawk avangin wicket nga chiah la hloh mah se run 577 an siam tawh avang leh chak an duh avangin an declare.

New Zealand bat hun a thleng a, run 299-ah an out fai vek. Indian bowler Ravichandran Ashwin-a'n run 81 chiah pein wicket ruk a laa player langsar a ni.

Third Test thawh hnihnaah India tan Cheteshwar Pujara chuan century (101 not out) siamin wicket thum chauh la hloh mah se run 216 an siam belh avangin an declare. India hian innings pahnih belhkhawmin run 793 an siam a, New Zealand target atana an run siam zat chu 495 niin Men in Blue hi chak chiang angah a la ngaih theih loh.

Kohli thutlukna huaisen chuan rah ṭha a thlen a, Tamil tlangval Ravichandran Ashwin a langsar nawn leh bawk. Chennai bowler Ashwin hian run 59 chiah pein wicket sarih a la a, New Zealand hian run 153 bak an tlin lo. Men in Blue-in run 321 zetin hnehna an chang.

Khawvel No. 1

Holkar Stadium, In-dore-ah India cap-tain Kohli-a'n cricket legend Sunil Gavaskar hnen aṭangin ICC Test Champion-ship nomawi a dawng a, official-in India chu ICC Test ranking-ah pakhatna a ni nghal bawk.

India hian Kohli-a captain-na hnuaiah a zawnin series vawi li an lakna chiah a ni a, Black Caps an hneh hma hian Sri Lanka, South Africa leh West Indies te an hneh.

MS Dhoni-a'n December 2014-a captain hna a kalsan hnuah India hian vawi 10 hnehna an chang a, vawi nga inhnehtawkin vawi khat chiah an chak lo. Mahni mual hmang thiam Men in Blue hian December 2012 hnuah India ramah test match 13 khel tawhin hneh loh an tawng lo. Kum 1977-1980 inkar hian India hian mahni ramah match zawnin vawi 20 hneh loh an tawng lo a, 1960-1964 inkar khan match 16 chhung hneh loh an tawng lo bawk.

Hmabak ODI

India hian October 16, Pathianni khian HPCA Stadium-ah New Zealand nen ODI an khel nghal dawn a, series hi best of five a ni ang.

Black Caps hmachhawn tur India squad chu : MS Dhoni (C), Virat Kohli, Rohit Sharma, Ajinkya Rahane, Manish Pandey, Suresh Raina, Hardik Pandya, Axar Patel, Jayant Yadav, Amit Mishra, Jasprit Bumrah, Dhawal Kulkarni, Umesh Yadav, Mandeep Singh & Kedar Jadhav.