Oct 17-ah Flying Christabel MPL Under 18

Flying Christabel Mizoram Premier League Season 5 Under 18 inelna chu October 17 hian khelh ṭan a ni dawn ta.

Khelmual remchan hun thlirin inelna kalpui dan tur hi ruahman a ni a, tun season-ah hian club pariatte vawi khat ṭheuh an inkhelh kual hnuah a sang paliin semi final an khel dawn a, chumi zawhah final an khel zui ang - semi final leh final hi single leg-a khelh ve ve tur a ni.

MPL Under 18 intihsiaknaah hian January 1, 1998 leh a hnu lama piang chin tan khelh theih a ni a, birth certificate-te endikin player ṭhenkhat chu an certificate a fel tawk loh avanga chhawk an ni.

MPL U18-ah hian champion lai chu Mizoram Police an ni a, Chanmari FC chu ṭum hnih an lo champion tawh a ni.

MPL Under 18 sponsor-tu Flying Christabel hi Canteen Kual, Dawrpuia awm niin zin veivahnaa (air ticketing) an buaipui theih bakah tour operator an ni tel bawk.