Germany an chak

Germany-in Northern Ireland laka hnehna chang turin harsatna an tawk lo a, first half-a Julian Draxler leh Sami Khedira goal khung hmangin an mikhual team hi World Cup qualifier-ah 2-0 in an hneh.

Season thara Premier League lam pan tur anga an sawi Draxler hian minute 13-naah Germany tan goal hmahruai hi a khung a, Mats Hummels-a siamsak chu Khedira hian an goal hnihna turin a khung bawk.

Group C-ah Germany hian hma an hruai chhunzawm zel a, Azerbaijan chuan ngam loh tawng loa an kaltluan chhawm nung turin Czech Republic chu goal khung loa an inhnehtawkpui avangin beisei loh takin pahnihna dinhmun an hauh zel bawk.

Norway-in an mikhual San Marino laka hnehna chang turin harsatna an tawk lo a, Adama Diomande, Martin Sa-muelsen, Joshua King leh Junior Simoncini own goal hmangin 4-1 in hnehna an chang. San Marino goal neih-chhun hi Mattia Stefanelli khung niin kum 2001 World Cup qualifier hnua khual-muala San Marino goal hmasa ber a ni.

Germany coach Joachim Low chuan, "Hma takah goal hnih kan khung avangin kan tan chak a harsa tawh lo. Northern Ireland khan goal an chhuah hma chungin an khelh dan thlak danglam an tum lo a, a hnung lamah an inhnawhkhawm vek a ni," tiin goal dang an khung belh loh chhan a sawi.