Slovenia laka England chhandamtu Joe Hart
Gareth Southgate-a en-kawlna hnuaiah England chuan Thawhlehni zan khan World Cup qualifier khel turin Slovenia an lenchilh a, a match hmasa bera Malta hnehpuitu Southgate-a'n fiahna hautak a hmachhawn hmasak ber a paltlang zo lo - an mikhualna ramah goal khung loin an inhnehtawk a, kum thum chhung qualifier-a hnehna an la chan vek chu a tawp ta. Point khat nena haw England vanneih nan goalkeeper Joe Hart chu player langsar a ni.
Serie A club Torino-a loan hmanga khel mek Hart hian Eric Dier leh captain Jordan Henderson backpass sual vanga Slovenia-in Josip Ilicic hmanga vawi hnih lai hun ṭha an neih chu a dan sak a, Atalanta midfielder Jasmin Kurtic ball tauh ṭha zet chu ropui takin a dang bawk - world class goalkeeper lo tan dan chi a ni lo.
Middlesbrough boss hlui Southgate-a'n Malta laka sawisel hlawh captain Wayne Rooney chu bench-ah a dah a, Manchester United captain ni bawk Rooney aiah hian Liverpool captain Jordan Henderson chuan captain armband a hreng.
Point thum hmuh beiseiin Southgate-a'n minute 72-naah Wayne Rooney luhtir mah se kum 30-a upa striker hian minute 18 chhungin danglamna a thlen thei lo a, a vawi hnih nana England kawr hatu Jesse Lingard shot ṭha tak chu Jan Oblak-a'n keeper ṭha a nihzia pholan nan a hmansak bawk.
Zan harsa
Southgate-a'n inkhelh
ṭan hmain captain Wayne Rooney bench-a a dah tur thu a sawi a, kum 46-a upa ma-nager hi a huaisenna avangin fak a hlawh hle. Mahse, Boro boss hlui hian khelmual pawna huai-sen taka a chetna chu khelmual chhungah a naute rilruah a tuh thei lo a, England boss nghet a nih theih dawn leh dawn loh fiah nana match li chhung England hruai tur hian match hnih-a Three Lions a kaihhruai dan en chuan Eng-land manager nih a phu rih lo.
Hetihrual hian chhuanlam tur a zawng dawn a nih chuan Southgate-a tan chhuanlam
ṭha tak a awm tho. Euro 2016-a an mualpho hnu lawka coach Sam Allardyce-a mualpho leh tak avangin England hi an talbuai a, khelmual chhung leh pawna an buaina a inchen reng. Big Sam-a hnuaia Slovakia an hneh pawh kha an vannei tih loh rual a ni lo a, injury time-a Adam Lallana goal an chakpui. Southgate hian team talbuai a rochun a, siam ṭha turin hun a ngah tawk lo - a match hmabak pahnihah Scotland leh Spain a hmachhawn ang.
Siamtharna nen Hart
Joe Hart-a'n a football kum hman tawh a zawnga kum duhlawm lo ber a hmang mek - Euro 2016-ah Wales leh Iceland laka a chetsual vangin a mualpho tawh a, Manchester City boss thar Pep Guardiola-a'n English keeper hi Etihad Stadium-a goal veng chhunzawm zel turin a ringtawk lo bawk.
Siamtharna chan beiseia Italy lama loan-a khel mek keeper hian a team chu hnehna chanpui zo lo mah se Slovenia hmachhawn hi siamtharna chan nan a hmang a, mualphona laka ta Dier leh Henderson a chhanhim mai bakah goal ngei tur nia ngaih vawi tam tak a dang bawk.
Ṭha tawk lo Lions
Iceland striker Eidur Gudjohnsen-a'n Euro 2016 last 16 aṭanga England an hnawhchhuah hma khan an coach Lars Lagerback chuan Three Lions chu khawvela team an phu tawk aia fak hlawh nasa ber an nih thu a hrilh niin a sawi a, Thawhlehni zanah Sweden manager hlui thusawi dikna a lang nawn.
FIFA ranking-a 67-na dinhmun luah pha ṭawk lakah hian England hi hei aia ropui zawka khel tura beisei an ni. Malta laka beisei phak lo winger Theo Walcott chu a dan pangngaiin a khel chhe lehpek hle a, striker Daniel Sturridge-a'n Liverpool bench-a a ṭhut ṭhin chhan a pholang bawk. Manchester City-in defender John Stones mana pound maktaduai 47 an sen ngam chhan erawh hmuh turin a awm a, minute 82-naa Sturridge thlaktu Marcus Rashford chu a lut har mah mah niin a lang bawk.