Mizo footballer Grace Lalrampari biangbiakna

India-in 2022 AFC Women's Asian Cup a thleng dawn a, inpuahchahna a nei ṭan der tawh. Tunah hian Goa-ah hmeichhe footballer ṭha thlanchhuah 30 ten training an nei mek a, Mizo nula Grace Lalrampari pawh a tel.

Tun ṭumah hian Grace-i biangbiakna kan nei dawn a, Mizo mipa tam takin an tuina ber 'football' career atana an thlan ngam loh laiin Salem Veng nula hi chuan school-a a nih tum an zawh pawhin 'Football Star' tiin a chhang ṭhin.

Grace-i hian eizawnna atan football a luhchilh a, Mizoram a champion pui tawh bakah India rama hmeichhe football inelna sang ber Indian Women's League-ah Gokulam Kerala a champion pui tawh bakah kum 2018 khan AFC Under 19 qualifying-ah India leh Thailand inkhelh ṭumin goal a khung. Salem Veng nula tumruhna leh huaisenna hi a chhuanawm hle. 

Grace-i : Ka tet lai aṭangin ka tui ṭan a, mipa ho nen kan inkhel ho ṭhin. Kan inkawt velah kan inkhel ṭhin. Ka naupan lai khan TV-ah hmeichhe football khel ka hmu fuh a, ka pa vawk chaw chhum lai kha ka va ko a, inkhelh ve ka duh thu ka hrilh.

School-ah kan nih tum min zawh hian midang chuan doctor, engineer etc an tih laiin kei chuan 'Professional Football Star' tihin ka chhang a, an nui dur dur zel.

Grace-i : Ka pa hian min tuipui ber mai. Kan unau hi pali kan ni a, hmeichhe pathum leh mipa pakhat. Ka pa hian football khelh ṭhin awm se a duh a, mipa awmchhun hian a tui si loh avangin min tuipui a ni ber.

Ka nu hi chuan football khelh hi a phal ṭhin lo. Ka pa nen hian a rukin kan bazar a, ball boot kan lei ṭhin. In kan thlen hian ka nuin a hmuh loh nan gate-ah ball boot kan dah a, a hnuah ka va la leh ṭhin. Tunah chuan ka nu pawhin min tuipui tawh e.

Grace-i : Ka pa nen kan Sports Department-ah kan kal ve tawp a, anni pawhin chhan ngaihna tak min hre lo. Vanneihthlak takin kum 2012 khan Subroto Cup-ah hmeichhe inelna an tel a, trial turin min rawn hriattir a, thlan zingah kan tel ve.

Miss Manuni hi ka coach hmasa ber a ni a, Subroto Cup zawhah hian Mizoram team a enkawl nghal. Ka la naupan deuh avangin thlan ka ni lo a, amaherawhchu training ve ka dil. Ka training dan te, ka khelh dan te aṭangin coach rilru ka hmin a, a tirah squad-ah koh ni lo mah ila thlan zingah ka tel.

Grace-i : Manchester United ka ṭan a, ka player duh ber chu Cristiano Ronaldo a ni. Chutihrualin ka naupan lai chuan ka huai avangin min keeper tir ṭhin a, Shaolin Soccer lar la kha a nia. A tawpa mipa zinga a changtunu Mui-i (Zhao Wei) a rawn keeper a, a rawn chet ṭhat vangte kha a ni ang. Keeper nih kha hrehawm ka ti lo.

Amaherawhchu Mizoram team tana ka trial khan winger-ah min dah a, winger leh forward position-ah hun rei tak khel. National Sub Junior Girls kan champion khan centre midfield-ah ka khel a, best player-ah min thlang. Midfield-a khelh hi nuam ka ti a, Toni Kroos hi ball pass a dik avangte leh a khelh dan hrim hrim avang hian ka entawn deuh ber.

Grace-i : Inkhelh mi tan chuan fans an awm tam hian a nuam a, College Football kha nuam ka ti khawp mai. Pachhunga University tan kan khel a, kan coach Sir Sabito Remlalthlamuanpuia khan min ring a, minti phur thiam si a. Ṭantu kan nei ṭha bawk nen khatihlai kan hun tawn kha ka theihngilh thei lo. 'PUC is the Best'.

Kum 2018 khan India aiawha kan khelh ṭumin AFC Under 19 qualifying round-ah Thailand lamah goal awmchhun ka khung a, Thailand hi kan lo la hneh ngai loh avangin ka goal khung hi kan hotute pawhin an ngai hlu a, keipawhin ka dah sang hle.

Grace-i : 2015 National Sub Junior Girls-ah Mizoram kan champion pui a, India Sub Junior-a tel turin kum 2016 khan mi paruk trial turin min ko. Chung zing aṭang chuan kei, Ofee Hmingchhuanpuii leh B. Vanlalhriattiri te min thlang.

Sub Junior-ah hian vice captain ka ni a, ka chet ṭhat ve bawk avangin hemi kum vek hian Under 19 team-ah min telh nghal. India aiawh tel tura kohna hi January 2019 khan ka dawng.

India senior team-a ka tel hnu hian Turkey, Vietnam, Spain leh Uzbekistan-ah te kan zin tawh.  Turkey-ah hian match ruk an khel a, vawi khat bench aṭangin ka lut. Vietnam leh Uzbekistan-ah hian vawi hnih ve ve kan khel a, ka lut lo. Spain-a kan kal ṭum hian vawi ruk kan khel a, bench aṭangin vawi hnih ka lut.

India senior team-a hmun pawimawh chang pha tur chuan hmabak a la thui hle.

Grace-i : Manipur hian player an nei ṭha hle. Ka position-ah hian Ngangom Bala Devi leh Ratanbala Devi te an awm a, an ṭha dun hle. Tuna kan camp-ah erawh Bala Devi hi a awm rih lo a, Rangers tan a khel mek. Spain-ah khan kan zin ho a, khami ṭuma a khel kha Scottish club scout-tenan hmu fuh a, an lalut. 

India player pawimawh ni pha tur leh Mizoram ti hming ṭha turin theihtawp ka chhuah zel ang.

Pa Hming : H. Lalramliana

Nu Hming : Rammuanpuii

Address : Arhuan, Salem Veng, Aizawl

- 2015 National Sub Junior Girls (Champion)

- 2016 RGKA Women's Football Tournament (Champion)

- 2017 Subroto Cup Junior (Pahnihna a ni a, Best Player-ah thlan a ni)

- I Day Football 2019 (Champion)

- Women's League 2019 (Semifinalist an ni a, Top Scorer a ni bawk)

- Aizawl FC 2016-17 (Group Stage)

- Mumbai Rush Soccer 2017-18 (Group Stage)

- Gokulam Kerala 2019-20 (Champion)