A vawi khat nan Mumbai-in point hloh

Mumbai City chuan Thawhlehni zan khan an mikhual Atletico de Kolkata chu goal khat ve ve khungin an inhnehtawkpui a, a vawi khat nan India Super League khelh mekah point an hloh ve ta. North Mualcheng tlangval Lalhmangaihsanga Ralte khelhna club hian an match hmasa pahnihah hnehna an lo chang ve ve tawh a ni.

Inkhel ṭan aṭanga minute 27-na lekah Mumbai City tan Matias Defederico chuan goal hmahruai a khung a, Argentina tan pawha lo inlan ve tawh forward hian ISL match thum a inlan tawhah goal hnih a khungna chiah niin penalty area pawn aṭang chiaha a shot ṭha zet hi ATK keeper Debjit Majumder tan dan ngaihna a awm lo.

Minute 72-naah Mumbai City midfielder Pronay Halder chuan hlauhawm taka Kolkata captain Borja Fernandez ball chhuhsak a tumna lamah a yellow card pahnihna a hmu a, West Bengal midfielder hi hnawhchhuah a ni. Atletico de Kolkata an phur sawt a, minute 82-naah player tam zawk an nih chhawr ṭangkaiin Spanish mid-fielder Javi Lara chuan an si phurh sutna goal a khung.

Mumbai City tan ṭum dang ang bawkin Sena Ralte-in inkhel bul a ṭan a, David Lalrinmuana erawh Costa Rica coach hlui Alexandre Guimaraes enkawlna hnuaiah hmun a la chan phak loh chhunzawm zel. Kolkata club tan Lalrindika Ralte chuan inkhel bul ṭan lo mah se season khat hliam vanga a chawlh hnua lo kir leh Didika hi bench aṭangin tlanluh tir a ni a, Robert Lalthlamuana'n ISL match hmasa bera bul a ṭan hnuin hmun a chang leh tawh lo.

Mimal Lawmman

Emerging Player of the Match Boithang Haokip, Mumbai City

Hero of the Match Javi Lara, Atketico de Kolkata

Zanin Inkhel Tur

Chennaiyin FC 07:00 PM FC Goa