Conte hnuaiah kan fit - Mikel

Chelsea midfielder John Obi Mikel chuan Jose Mourinho leh caretaker manager Guus Hiddink hnuaiah aiin Antonio Conte enkawlna hnuaiah Blues player-te chu an fit ṭhat zawk thu a sawi.

Portuguese manager Mourinho hruainain Chelsea hian 2014-15 season khan Premier League nomawi an chawi a, season liam taah erawh beisei an phak lo tak zet a, kum laklawhah manager thlak a ngai hial - kum tawpah pawh point 50 chiah hmuin table-ah 10-na an ni phak hram.

Kum 29-a upa Mikel chuan, "Tun hma aiin player-te an thawkrim a, manager thar kaihhruaina hnuaiah chuan season inbuatsaih nan pawh khan a let thawkin training kan nei hial. Hei hi Conte duh dan a ni a, rim taka kan beih avang hian season hmasa nena khaikhin chuan Blues player-te hi kan fit zawk," tiin a sawi.

Mikel chuan an manager chungchang sawi chhunzawmin, "Training-na hmunah a thusawi kan ngaithla uluk a, min fuih ang ngeiin khelmual chhungah kan zavaiin theihtawp kan chhuah ṭhin bawk," tiin a sawi.

Season hmasa ṭan dawn khan Chelsea hian inbuatsaihna match li chiah an khel a, vawi khat mah hnehna an chang lo. Community Shield-ah Arsenal an hneh lo zui bawk a, season hmasa khan league match an khelh tur zatve an khelh tlin hmain an nomawi an hloh dawn tih a chiang tawh.

Kuminah erawh Blues hian an rilru nguai ti harh thei tura an ngaih Italian manager an ruai a, tun hma zawng aiin training an nei hautak zawk pawh hi a mak lo. Tun season-ah match sarih an khelh tawh aṭangin point 13 an hmu tawh a, hmahruaitu Manchester City nen an inthlauhna chu point nga a ni.