Venezuela hnehtu Brazil-in hma an hruai

World champion vawi nga ni tawh Brazil chuan 2018 FIFA World Cup qualifier-a an match hmasa lamah beisei phak lo mah se inkhel vawi 10 an hmachhawn meuh chuan ball pet thiam ram an nihzia an lantir leh tawh. Tite naute hian Venezuela 2-0 a hnehin South America ram 10 inelnaah hmahruaitu an ni.

Thawhlehni zan inkhel dangah hun rei tak hmahruaitu lo ni tawh Uruguay chu Colombia nen an inhnehtawk a, Copa America nomawi kawltu Chile-in hnehna an chan laiin Argentina erawh Paraguay lakah an tlawm thung.

Brazil tak tak

Estadio Olimpico Metropo-litano de Merida-a inkhelah ṭan aṭanga minute riatna lekah Venezuela keeper Dani Hernandez a chesual a, ho lam takin Gabriel Jesus hmaah ball a pet phei. Nakkum January thlaa Manchester City zawm mai tur forward hian a hun
ṭha neih chu box pawn aṭanga
keeper Hernandez pet khum nan a hmang a, goal 'cool' tak a ni. Kum 19-a upa Jesus hian Brazil tan match li a khelhah goal li a khung der tawh!

Venezuela an awm mai mai bik lo, Adalberto Penaranda chuan an siphurh sutna hun ṭha a neih chu goal chungah a pet chhuak a, kum 19-a upa forward hian Brazil defender pahnih a tlan pelh hnuah keeper Alisson Becker chauh hmachhawn mah se goal zawnah a pet thei lo. Second half ṭantirhah Brazil bawk a hlauhawm zawkah an ṭang leh a, midfielder Renato Augusto-a cross ṭha tak chu minute 53-naah Chelsea duhlai Willian chuan chiang zetin a khung a, goal dang a luh belh tawh lo.

Brazil hian World Cup qualifier-a an match hmasa berah Chile 2-0 in an hneh lo a, match 10 khelh tawh aṭangin vawi thum an khingpui an inhnehtawk pui bawk. Tite naute hian an match hnuhnung paliah hnehna an chang vek a, point 21 hmuin hmahruaitu an ni - Russia pan turin kawng dik an zawh mek.

Brazil coach Tite chuan, "Neymar tel lo pawhin team puitling kan ni tih kan lantir thei a, kan player ṭha ber tel lo pawhin hnehna chang thei kan nih zia kan pholan theih avangin ka lawm. Lionel Messi tel loa Argentina an chak thei lo ang kan ni lo," tiin an elpui ram a kap tel zauh. Barcelona star Neymar hian a zawna vawi thum yellow card a hmuh avangin Venezuela a hmachhawn ve thei lo.

No Messi = No Goal

Argentina-in hliam vangin Lionel Messi an la chhawr thei lo a, an captain awm loin Paraguay lakah goal an khung thei lo; mikhual team hian minute 18-na lekah counter attack aṭangin forward Derlis Gonzalez hmangin goal an khung a, minute 90 chhungin world champion vawi hnih ni tawh ram hian an sut thei lo.

Copa America hnua a vawi khat nan Sergio Aguero-a'n ram tan inkhel bul a ṭan a, Manchester City striker penalty pet hi Paraguay goalkeeper Justo Villar chuan a dan sak. Peru nen an inhnehtawk ṭuma goal khat khungtu Gonzalo Higuain a hriam tawk lo a, winger Angel Di Maria-a'n a hun ṭha neihah goal zawnah a pet thei lo bawk.

Argentina hian Messi tel loin match thum an khel a, chak ni hmel an hmu miah lo. Venezuela leh Peru te inhnehtawk puiin Paraguay an hneh lo. Heng an match hnuhnung pathumah hian goal li an khung a, an lamah goal nga a lut thung. Edgardo Bauza naute hian point 16 hmuin table-ah pangana an la ni hram a, an hnuai chiaha awm Paraguay hian point khat chiahin an phak tawh lo - Russia pan tur chuan an insiamrem thuai a ṭul ang.

Javier Mascherano chuan, "Kan khel chhia a, kan thawhhona a ṭhat loh bakah kan rilru zawng zawng kan hmang lo tih a hriat. Tihsual kan ngah a, Argentina kawr kan ha a nih chuan hetiang mai mai a khel tur kan ni lo," tiin an ṭhat theih dan berin an la khel chhuak loah a ngai.

Inkhel dang

Inkhel dangah Chile tan Arturo Vidal a inlar a, Bayern Munich midfielder hian Peru lakah goal hnih (10', 85') a khung. Copa America nomawi a zawna vawi hnih chawi thei Chile hian match 10 an khelh
aṭangin vawi li hnehna an chang.

FIFA World Cup champion hmasa ber Uruguay (1930)-in match kua an khelh thleng khan hma an hruai a, Thawhlehni zan khan khualmualah Cristian Rodriquez leh Luis Suarez te goal hmangin 2-1 in hma hruai mah se hun tawp dawn a Yerry Mina goal hmangin Colombia-in an siphurh an sut zo a, point khat ve veah an lungawi a ṭul.