Belarusian football-in ngaihven a hlawh
Coronavirus vangin khawvel hmun hrang hrangah inkhel chhunzawm theih a ni lo a; Premier League, La Liga, Bundesliga, Serie A leh league langsar dang an chawl ṭhup. Hetiang karah hian Belarusian Premier League erawh khelh chhunzawm a ni a, tun hmain football ngainatute 'titi' tling pha lo mah se tunah erawh Europe ram chanchinbu lian ber thlengin he league chanchin hi an ziak tawh.
Belarusian Premier League-ah hian team 16 an awm a, kar liam ta khan round hnihna khelh zawh a ni a, tun thlengin Covid-19 vanga chawlh tumna an la nei lo. Inrinnia match ruk khelh zingah derby match FC Minsk leh Dinamo Minsk pawh telin mualneitu FC Minsk 3-2 in an chak.
Belarus khawpui Minsk-a inkhel hi entu 3000 vel an awm a, 'mask' vuah awm bawk mah se vuah lo an tam zawk. Club ṭantu ruhkawl phei chuan kawr ha loin inkhel an en a, Covid-19 vanga hlauhthawnna an nei lo. Dinamo-in inkhel chanchin an ziahnaah phei chuan, "Derby match hi khawvela official match awmchhun," tiin an ziak a, an inchhuang letling hle.
Mi maktaduai 9.5 vel chenna Belarus-ah hian coronavirus vei 100 an la tling lo a, thi an awm lo. Europe ram dangte an inkharkhip laiin Belarus president Alexander Lukashenko chuan a ram mipuite chu Covid-19 laka him nan vodka in turin a chah a, hlauhthawnna a nei lo hle.
Chutihrualin mawlmang taka inelna kalpui erawh an ni lo. Belarus Football Federation thupuangtu Aleksandr Aleinik chuan, "Sports ministry-in dan a zam ang te kan zawm vek a, hnathawktu zinga fan nena inhnaihchilh te chu kut kawr pek vek an ni," tiin a sawi.
Belarus Football Federation hi TV lama en duh pawh an pung chho a, sports lam pe chhuak ṭhin ram 10-in tihchhuah phalna leiin chung zingah chuan Russia, Israel leh India te pawh an tel. Belarus-ah hian inelna hi a kal reng thei a nih chuan football ngaintuten an club-te hming hi an hre chauh ni loin ṭan zawng an nei fur thei ang.