Gundogan-a'n Liverpool champion-a puan a duh Tawp chin a awm tur a ni - Harry Kane
Premier League champion lai Manchester City midfielder Ilkay Gundogan chuan coronavirus vanga season khelh zawh a nih loh chuan Liverpool hnenah nomawi hlan ṭha a tih thu a sawi a. Hetihlai hian England captain Harry Kane erawhin June 30-a league khelh zawh theih a nih loh chuan tun season chu awmze nei loin tawp mai se a tih thu a sawi thung.
Covid-19 vangin England-ah April 30 thleng chu football khelh a ni dawn lo a, Liverpool-in anmahni hnaih bertu Manchester City aiin point 25-in an hmu sang mek. Kum 30 hnua Reds-in nomawi an chawi theihna tur hian Jurgen Kopp-a hoten match hnih chak chiah an mamawh tawh.
Germany international Gundogan chhuan, "Infiammi kan nih angin kan rilru put hmang pawh a dik tur a ni. Season an titawi a, Liverpool hi champion-a an puang a nih pawhin kei chuan ka pawm thlap," tiin an elpui chuan champion an phu thu a sawi.
April 3 khian Premier League club-te an inhmu khawm leh dawn a, inkhelh ṭan hun an sawn leh ngei a rinawm. Premier League tiamin English Football League season hi May thla laihawlah a tawp ṭhin a, tunah erawh season tawp hunah hian khelh hmabakte hi an khel ṭan leh thei ang em tih a chiang lo.
Kum 29 mi Gundogan chuan, "Thlirna hrang hrang a awm thei a. Tun dinhmuna club che ṭha te tan chuan tuna season han tihtawp chu pawm thiam a har khawp ang. Chutihrualin club che ṭha lo tan - tla thei dinhmuna ding tan chuan tuna season tihtawp mai hi chanchin ṭha a ni thei thung ang," tiin a sawi.
UEFA president Aleksander Ceferin chuan June 30-a inelna ṭan leh theih a nih loh chuan season a tawp theih thu a sawi a, Tottenham striker Harry Kane pawhin a thlawp. England captain Kane chuan, "Premier League thuneituten league kan zawh theih nan theihtawp an chhuah ang. Chutihrualin tawp chin erawh a awm tur a ni a, ka thlirnaah chuan June 30 hi a tawp hun tur a ni," tiin a sawi.
UEFA-in Europe-a league hrang hrang zawh theihna turin kumina neih tur European Championship chu nakkumah an sawn tawh a, heti chung hian European football hriatthiam a la har hle. Kane chuan, "Football piah lamah chuan hriat vak ka nei lo a, sum dinhmun nghawng dan tur pawh ka hre lo. Ka thlirna aṭang chuan June-a season kan zo thei lo a nih chuan season thar tur atana inbuatsaih mai ṭha ka ti a, July emaw August thla thlenga inkhelh hi a ṭhatna tur ka hmu lo," tiin a ngaihdan tlang takin a sawi.
Kane-a khelhna Tottenham hi match 29-ah point 41 hmuin pariatnaah an awm mek a, season liam ta Champions League finalist ni mah se season thara Europe inelna sang ber khel turin an dinhmun a ṭha lo. Season hi awmze nei loa a tawp a nih chuan Jose Mourinho enkawl Spurs hi a vannei tur zinga mi an ni ang.