Inelna hi kuminah a zawh hman a rinawm lo - Ferrari boss Mattia Binotto
Formula 1 season thar neih ṭan theih a la ni lo a, tun ang zela Covid-19 vanga buaina a thleng zui a nih chuan engtik hunah nge an ṭan theih ang tih pawh hriat a la ni lo.
Ferrari boss Mattia Binotto chuan inelna neih ngei a duh a, chutihrualin inelna an neih hnem dana zirin nakkum January thla thleng pawh an intlansiak a ngaih a rin hial thu a sawi.
Inelna neih hmasak tur pariat chu a hun pangngaiah an nei thei dawn lo tih a chiang vek tawh. July thla a tlan tur British Grand Prix chu a hmasa ber tura ngaih a ni mek, hei pawh hi a la chiang chuang lo.
Binotto chuan, "Rawtna leh ruahmanna hrang hrang a awm, inhnaih chilh taka intlansiak theih a ni. Inelna tak neih hma Zirtawpnia tlan chhin kan neih ṭhin pawh tih tawp lailawk theih a ni.
"Ruahmanna langsar tak zingah nakkum January thla thlenga inelna neih pawh a tel," a ti. Ruahman lawk dan chuan tun season intlansiak hnuhnung ber chu November 29 hian Abu Dhabi GP neih tur a ni, tunah erawh hri leng vangin engkim a chiang lo vek.
Binotto chuan sawi zawmin, "Team dang thuneitute nen pawh kan inbe rawn a, F1 chairman Chase Carey leh FI thuneitu lam nen pawh a hma thei ang berin kan kal zel dan tur hi kan ngaihtuah ang," a ti.
F1 chairman Carey hian kar hmasa khan kumin nipui lai hian inelna ṭhenkhat chu an neih hman a beisei thu a lo sawi tawh a, "Intlansiak 15-18 vel chauh pawh kan nei mai thei," a ti.
A tira ruahman dan chuan kumin hian car intlansiakna sang berah hian inelna vawi 21 a awm ang, tunah erawh an neih kim theih a rinawm ta lo. World Championship nei tur chuan a tlem berah intlansiak vawi riat tal an neih a ngai ang.