Mohammad Ahsan leh Hendra Setiawan te tan hun ṭha lo a ni thei
Tokyo Olympic 2020 neih hun kum khata an sawn tlai chu Mohammad Ahsan leh Hendra Setiawan te tan hun ṭha lo a ni thei. Indonesian badminton khel thiam pahnih hi badminton huanga Olympic gold medal la thei upa ber nih tum an ni.
Coronavirus vangin kumina neih tur Olympic chu nakkum atan sawn a ni a, a hun tur la chiang chiah lo mah se Japanese media-te chuan nakkum July thla tawp aṭanga August thla a nih an ring.
Kum 32 mi Setiawan leh kum 35 mi Ahsan te hian season duhawm an hmang, doubles huangah world number 2 niin kuminah match thum chiah chak loh an la nei a ni.
Tunah khel ṭha viau mah se an coach Herry Iman Pierngadi erawhin an dinhmun sawilawk harsa a ti. Herry chuan, "An kum angah chuan taksa fit taka awm reng a harsa mai thei. Inbuatsaihna pawh ṭha lehzuala an neih a ngaih phah dawn a ni," a ti.
Indonesian star pahnih hian Rio Olympic-ah khan beisei an phak lo, group stage paltlang loin an tla. Mahse, a hnu lamah an rawn tho chhuak, a vawi thum nan world champion an nih bakah World Tour Finals-ah an chungnung ber bawk.
Tokyo Olympic-ah hian gold medal la se la chuan record thar a ni dawn, kumina an hun ṭha sawn hlat a nih avangin kum khat dang an nghah leh rih a ngai dawn tihna a ni.
Setiawan chuan, "Olympic hi kan thil tum leh ngaihhlut ber a ni a, chumi atan chuan theihtawpin inbuatsaihna pawh kan nei chhunzawm zel ang," tiin an beidawn loh thu a sawi.