An ramah Son-a a haw rih
Tottenham forward Son Heung-min chu South Korea-ah a haw rih, an ram a haw chhan hi hri leng leh harsatna dang vang ni loin 'mimal thil' vang a nih thu tarlan a ni.
Covid-19 vangin Britain a inkharkhip mek a, inkhel a awm thei rih lo. Premier League club Spurs chuan an player hi Asia khawmualpui lamah haw an phalsak lailawk.
February 16 khan Tottenham leh Aston Villa an inkhel a, he match an neih ṭum hian Son hi a hliam. Tunah chuan a hliam hi a dam chho mek tawh a, inkhel tur erawh chuan a la inpeih rih lo.
A hliam vang hian February thla khan South Korea-ah hian a haw tawh a, England lama a let leh hnu hian hri leng kaihhnawihah ni 14 chhung chu khung hran a lo ni tawh. Son bakah hian Spurs player dang Steven Bergwijn pawh Netherlands-ah haw phalsak a ni.
North London club chuan thu chhuah siamin, "Club chuan Heung-Min Son leh Steven Bergwijn te chu an rama haw a phalsak. Player pahnihte hian chawlh an hman chhungin an mahni awmna hmunah ṭha taka an in enkawl dawn bakah training hautak lo zawk an nei ang," tiin an sawi.