June thla tawp thleng TT an chawl dawn
International Table Tennis Federation (ITTF) chuan Covid-19 vanga harstana thleng thei hrang hrang an ngaihtuah a, kumin June 30 thleng chu eng inelna mah an buatsaih dawn lo - world ranking pawh an dinhmun ngaiah an ding ang.
Pathianni zan khan ITTF Executive Committee chuan thu chhuah siamin, "Coronavirus vangin Tokyo 2020 Olympic leh Paralympic Games-te chu a hun sawn a ni tawh a, keini lam pawhin June 30 thleng chu eng inelna mah kan nei rih lo ang.
"April 15 hian meeting neih a ni leh dawn a, chumi hunah chuan kan kal zel dan tur leh ruahmanna tharte chu tarlan a ni ang. Ranking pawh a ngai anga awm reng tur a ni ang, chawlh hun chhung pawh tih sei theih a la ni," an ti.