Inter leh Napoli inum zel

Serie A hmahruaitu Napoli chuan Inrinni zan tir lam khan Lecce chu 1-0 a hnehin an hmahruaina an sawhnghet a, an chunga awm te an chak tih hresa chungin Inter Milan an inlan chhunzawm ve thung, an mikhual Hellas Verona chu 1-0 thoin an hneh.

Italian football inelna sang berah hian, match 35 an khelh tawh chinah Antonio Conte enkawl Napoli hian point 77 hmuin hma an hruai mek, an hnuaiah champion lai Inter Milan awmin an inthlauhna chu point hnih chauh a ni.

Naples club tan Romelu Lukaku-a goal khung chu hnawlsak ni mah se a hnuah Giacomo Raspadori-a hmangin an khung leh a, anmahni goal an venhim theih zui avangin point thum an hlawh chhuak.

Antonio Conte chuan, "Kawng dik kan zawh a, hmabak erawh kan la hlenchhuak lo. Keini emaw Inter Milan emaw champion pawh ni ila, nomawi chawi tu tan chuan season hriatreng tawh tur a ni ang," tiin an inkar a zau loh thu a sawi.

Inter Milan tan an nomawi humhim tur chuan chak vek a tawk ringawt tawh lo, an chunga awm Napoli chetsual an chan tel a ngai tawh dawn. Hmabak pathum an la neihah na takin an inum zui ang.