CYMA Football-ah original document ken a ngai

LBS Suzuki 22nd Inter Branch YMA Football Tournament 2025 chu May 6, Thawhlehni aṭangin khelmual pali RG Stadium, 1st Bn MAP Ground, Chite Playground leh Muallungthu Playground-ah te khelh ṭan a ni dawn. Tun ṭum inelnaah hian player-te hi an veng/khua ngei an khelh theih nan tehfung atan Voter ID hman a ni a, Screening Sub Committee-in inelna hmachhawn tur team 154 te chu an endik vek tawh.

CYMA Football-a hian Voter ID chu tehfung bera hman a ni a, Voter ID la nei lo tan Aadhaar Card an hmang. Aadhaar Card hmang tan hian supporting document-ah Voter ID (Aadhaar Card pa/nu hming chuang) emaw ration card emaw digital birth certificate te phut tel a ni.

Screening-ah hian player engemaw zat paih an ni a, branch hruaitute hrilh hriat nghal vek an ni. Inelna ṭan hmain endik lawk ni mah se inkhelh dawnah player-te hian a tlinna original document ken ngei a ṭul bawk.

Tun ṭum inelna hi Voter ID hman a nih bakah kum 2024 hnu lama 'update' hman phal a nih loh avangin player inlak hriat tur a awm lo a, inelna pawhin ngaihven a hlawh phah bakah Aizawl khaw pawn branch-te pawhin champion beiseina an nei sang. Team tel 154 zinga branch 85 zet chu Aizawl khaw pawn a ni a, Aizawl khaw chhung (69) aiin team 16-in an tam zawk.