Manchester United tan final a hnai

Manchester United-in season chhe bik an hmang a, manager Erik Ten Hag an ban hnuah Ruben Amorim hnuaiah an che ṭha chuang lo. Europe bik thlir erawh chuan Manchester United chiah hi tun season-a tlawm la nei lo an ni a, Ningani zana khelh semifinal first leg-ah pawh Athletic Bilbao chu 3-0 ngawtin an hneh a, final lut turin an dinhmun a ṭha hle.

San Mamés-ah Man United tan Casemiro-a'n goal hmahruai a khung hnuah Bruno Fernandes-a'n goal hnih a khung a, 3-0 in Bilbao an hneh. Second leg hi May 8, Ningani zan hian Old Trafford-ah khelh a ni ang. Semifinal pakhat zawkah Tottenham-in Bodo/Glimt 3-1 in an hneh a, English club pahnihin final an lut a nih chuan season tharah Premier League club parukin Champions League an khel dawn.

Harrydinho

Athletic Bilbao-in an mual San Mamés-ah record an nei ṭha a, Man United an mikhual hmain match rukah vawi ruk an chak. Mahse, Amorim-a hote lakah erawh an record ṭha tak chu thai chhiatin a awm. Alejandro Garnacho-a'n Man United tan goal a khung nghalah a inngai a, VAR hmanga ennawn hnuah offside vangin pawm a ni lo.

Bilbao an insiamṭha rang a, Alejandro Berenguer-a'n box pawn aṭangin goal-ah pet mah se Andre Onana-a'n a dang. Iñaki Williams pawhin hnai tak aṭangin a tauh over a, Man United an vannei. Mualneitu goal nawr na zual a reh a, mihkhual team hun a inṭan.

Lyon an hneh ṭuma striker-a chhawr Harry Maguire-a'n mual ding lam sirah Mikel Jauregizar a bum kual a, hemi hnu hian ṭha zeta cross-in Manuel Ugarte tauh pial chu Casemiro-a'n a tauh lut. Brazilian midfielder tauh ṭha mah se inkhelh ban thlenga an sawi zui erawh Maguire a ball khawih a ni a, 'Harrydinho' hming lem pe tawk pawh an awm.

Danglamna red card

Man United an che ṭha zel a, Bilbao defender Vivian-a'n box chhungah Rasmus Hojlund a pawt tlu a, VAR hmanga ennawn hnuah penalty chawi ringawt loin an hnawt chhuak bawk. United captain Bruno Fernandes-a'n minute 37-naah goal hnihna cool takin a khung.

Frist half-ah Man United-in Fernandes hmangin goal an khung belh leh a, United captain hian Manuel Ugarte kheng zeuh chu um lutin chiang takin a khung. Amorim-a hote hian goal dang khung belh thei lo mah se inkhelah an chungnung a, harsatna nei loin 3-0 in an chak.

Eng nge an sawi?

Man United boss Ruben Amorim chuan, "Tunah chuan kan dinhmun a ṭha zawk a, min thlawp turin kan fan-te an awm tawh dawn bawk. Chutihrualin inkhelah chuan engpawh la thleng a ni," tiin final lut chiang angin a la insawi duh lo.

Bilbao boss Ernesto Valverde chuan, "Goal thum kan chhuah a nih chuan kan khingpuite finishing a ṭha tihna a ni a, keini erawh kan chance kan hmang ṭangkai lo. Man United ang team hmachhawn chuan tihsualin min hrem zel a, hetiang aṭang hian kan inzir a ṭul a ni. Old Trafford-a kan inkhelh hunah chuan engpawh a la thleng thei tih hriain ṭha taka khelh kan tum ang," tiin a sawi.