UCL khelh beisei Forest an chak lo

Premier League aṭanga Champions League khelh theihna kawng a inhawng zau a, beiseina nei sang tak Nottingham Forest chuan pathumna nih theihna remchang nei mah se an hmang ṭangkai thei lo, an elpui dangte tan chanchin lawmawm a ni thung ang.

Ningani zan khan Forest hian City Ground-ah Brentford an lo mikhual a, 2-0 in an chak lo. Nuno Espirito Santo enkawl Forest hian match 34 aṭanga point 60 hmuin parukna an ni a, pathumna Newcastle United an phak lohna chu point hnih chauh a ni.

Brentford tan hian forward Kevin Schade leh Yoane Wissa ten goal an khung. Forest tlarhma lam erawh an hriam tawk lo - FA Cup aṭanga an tlak hnuah insiamṭhat theihna hun nei mah se anmahni mualah ngei an chak lo a, season tawp lamah zui thei dinhmunah an ding mek.

Forest manager Nuno chuan, "Kan khel ṭha lo takzet a, kan chak lo hi a mak lo. Chutihrualin Premier League table lama kan dinhmun avangin ka buai lo a, ka ngaihtuah zui hman hek lo bawk. Kan tihsual siamṭhat dan tur ngaihtuah a ngai hmasa zawk a ni.

"Kan elpui dangte nena kan inthlauhna hi a la tlem em em a, match khat lekah a la danglam vek thei. Chuvangin kan hmabaka match khelh tur pali la awm hi ṭha taka kan khel thei a nih chuan kan tum ram kan thleng thei ang," a ti.

Season tirah kha chuan Forest hi table mawng lama talbuai tura ngaih an ni. Mahse, Wolves leh Tottenham te pawh lo enkawl tawhtu Nuno hoin beisei phak baka ṭhain season an hmang, pangana china awm theih an tum chhunzawm ang.

UCL khelh tum zinga mi Newcastle United chuan Pathianni zan dar 6:30 hian Brighton & Hove an lenchilh dawn. Magpies hi an manager Eddie Howe hoin an khel leh thei tawh a, mahse an midfielder Joelinton erawh tun season chhungin an inkhel thei dawn tawh lo.

Eddie Howe chuan, "Khup hliam vangin Joe a chawlh a ngai dawn, kan tan chuan channa lian tak a ni. Season hmawr bawk dawn hun pawimawh lai a ni a, a hmunruak hnawhkhah dan tur kan ngaihtuah a ngai," a ti.

League Cup champion Magpies hian Lewis Miley, Sean Longstaff leh Joe Willock te an la nei tho a, an buai lo tura ngaih a ni. Nomawi an chawi tawh bakah UCL khel tura an tling zui a nih chuan an tan season ṭha bik tak a ni ang.