Zaninah Super Cup final

Indian football season pawh a zo teuh ta hle - AIFF Super Cup final chu zanin dar 7:30 hian khelh a ni dawn a, FC Goa leh Jamshedpur FC ten champion an inchuh ang.

Goa hi an coach Manolo Márquez hnuaia an match hnuhnung ber tur a ni tawh - Spanish coach hian season tawp rualin, India chu full time-in a enkawl tawh dawn a, Goa a chhuahsan dawn.

Hyderabad tana Indian Super League nomawi chawi tawh Manolo hian Goa a pan hnuah nomawi chawi a la nei lo a, Super Cup nomawi nen a club hi thlah a duh dawn.

Super Cup champion hian cheng nuai 25 an hlawh dawn a, pahnihnain nuai 15 an dawng dawn. Mahse, sum hi an khelh chhan a ni lo a, champion team-in AFC Champions League Two preliminary round an khel dawn - hei hi a hlutna a ni.

Manolo chuan, "Asia khawmualpui inelna hmachhawn theihna remchang a nih avangin a phur loh theih loh. FC Goa hian kum li liam taah khan Champions League an lo khel tawh a, JFC erawhin an la khel lo - team pahnih hian he inelna hmachhawn hi kan châk," a ti.

Goa-ah hian Ayush Chhetri chu Mizoram player an kawl a ni a, final kalkawngah hian Gokulam Kerala (3-0), Punjab FC (2-1) leh Mohun Bagan (3-1) an hneh.

Jamshedpur boss Khalid Jamil chuan, "Kan chak chuan he club chanchina a vawi khat nan Asia huap inelna kan khel dawn a, kan tan chuan a pawimawh hle - kan theihna zawng zawng kan hlan ang," a ti a, I League-a Aizawl FC a champion pui hnuah a vawi khat nan nomawi chawi leh a châk.

Men of Steel hian final kalkawngah Hyderabad (2-0), NorthEast United (5-4; penalty) leh Mumbai City (1-0) an hneh a, Goa an huphurh lo ang - Mizo player C. Lalhriatpuia an kawl a, a kum a la nau deuh avangin a inlan erawh a rinawm lo.