Messi telna Inter Miami an chak lo

Lionel Messi hoin Inter Miami chuan Concacaf Champions Cup title lak beisei mah se an tum a hlawhtling ta lo. Nimin zing khan semifinal second leg khelh niin 3-1 in an tlawm.

An intawn hmasakah Vancouver Whitecaps chuan Inter Miami hi 2-0 in an lo hneh tawh bawk a, inkhel pahnih belhkhawmah 5-1 in an tlang chiang hle a ni - Messi leh Luis Suarez ten team an chakpui zo lo.

Chase Stadium-a inkhelah Inter Miami hian goal an mamawh a, a tir lamah Messi leh Suarez te hna thawh chawrin Jordi Alba chuan goal a khung, goal khat chauh an phurh tak avangin an beiseina pawh a nung thar.

Mahse, Vancouver lamin second half-ah na takin an vaw let - Brian White, Pedro Vite leh Sebastian Berhalter te chuan goal khat ṭheuh khung an chak tlang ta zawk a ni.

Inter Miami coach Javier Mascherano chuan, "Kan duhthusam chu final thlen a ni a, chak ngei pawh tumin kan bei nasa hle. Mahse, kan khingpui ten an khel ṭha zawk a, chak an phu tih kan hriat chian a ngai.

"Tunah chuan Major League Soccer lam kan ngaihtuah a hun a, chumi bakah chuan Club World Cup pawh kan hisap a ngai, inbuatsaih nan thla khat vel hun kan nei dawn," tiin an hmabak a ngaihtuah thu a sawi.

MLS Eastern Conference-ah Inter Miami hi pangana an ni mek; June thla a khelh tur Club World Cup an khelh hmain league match khelh tur pasarih an la nei hman dawn a ni.

Club World Cup-ah Inter Miami hi Egyptian club Al Ahly, Portuguese club Porto leh Palmeiras (Brazil) te nen an awm khawm.