Tennis chawlhsan ka rilruk hman - Sinner

Mipa tennis world number 1 Jannik Sinner chuan, hremna a tawh laiin a rilru a hrehawm hle tih a sawi a, inkhelh chawlhsan pawh a rilruk hman hial a ni.

Kum 23 mi Sinner hian season hmasa khan damdawi hman phal loh a hmang tih hriat chhuah niin, tun season Australian Open an khelh zawh khan thla thum chhung inkhel thei lo turin an hrem.

Tunah chuan hremna hi a hmang zo dawn a, kar leh lama khelh tur Italian Open-ah a inlan ang. Australian Open leh French Open inkarah hrem a nih avangin Grand Slam khelh theih loh tur a nei lo.

Italian tlangval Sinner chuan, "A nihna takah chuan Australian Open kan khelh hma leh tournament kan khelh lai pawh khan nuam ka ti tawh lo, a chhan chu chhui lai leh hrem theih ka nih avangin rilru kha a nuam thei lo a ni.

"Tennis court chhungah chauh a ni lo a, mahnia ka awm changte hian thil ṭha lo leh a thim lam ka ngaihtuah nasa thei em em a, tenni hi khelh chhunzawm tawh loa chawlhsan hial mai pawh ka duh ṭhin.

"Hun thawl leh intih harh te kha ka mamawh a, a chang chuan mahni chauha awm veng veng te kha nuam ka ti zawk hial ṭhin," tiin hremna tawrh chu hrehawm a ti hle.

Inkhel thei loin thla thum chhung awm mah se Sinner hian world number 1 a nihna a la chelh tlang thei, point a hmuh san fal hman bakah a dinhmun nek buai thei Alexander Zverev leh Carlos Alcaraz te an che ṭha tawk a lo a ni.