Silly Point: Ka hre lo

IPL ṭum 18-na kan hmang mek a, ṭum 17 zet kan en liam tawh. Kumin ang em ema league stage hmawr bawk dawn hnaiah (round 4 ṭheuh la khelh tur an nei) playoff lut chiang anga sawi theih la chian loh ṭum hi a awm kher awm lo e. He team 10 inelnaah hian a hnuai lama awm pathum Rajasthan Royals, Sunrisers Hyderabad leh Rajasthan Royals te an hnu fual deuh a, a bak team sarihte hi chu la inlehthal zak zak thei vek a ni.

Titi nikhua a tute nge kumin IPL chu playoff lut tura i rin? tia min han zawh pawh hian, ka chhana chu 'ka hre lo' tih hi a ni hrih.

Palian Ṭhangharh

League stage chawhma lama an khawsak dan en chuan point ruk pawh an hlawhchhuak zo lo mai ang a tih tur, Pi Nita Ambani naute Mumbai Indians tlai khawhnu a rawn ṭhangharh hian, thoveng deuha table ler lama awm team ṭhenkhat dinhmun a rawn sawinghing zo ta vek mai.

IPL chanchina nomawi chawi ngun ber ni turin a ṭum ruk nan Mumbai Inidans hi an champion tlang a nih pawhin thil awihawm loh a ni dawn ta hauh lo mai. Rohit Sharma kaihhruaina hnuai khel Mumbai hi pathumnaah an awm mek.

Zawhna chu

Bul ṭan ṭhat chu a chanve zo an ti a, mahse bul ṭan ṭan ṭhat nge a chanve hnu lama chet ṭhat tih hi zawhna chhan har tak a ni. Mumbai Indians ṭhangharh kan sawi zo a. A tir lama vung taka kal, la champion ngai lo team pahnih Delhi Capitals leh Lucknow Super Giants te erawh knockout lut lo thei an ni leh tawh.

Capitals leh LSG te hi an top gear speed hman nasat luatah, lap tawp lama petrol tlan kang ṭan an ang deuh tlat. Chutihrual chuan bul ṭan ṭhat hi chanve zo an lo tih fo angin, Playoff luh theihna kawngkhar zau tak an tan a la inhawng tho lawi si.

A daih rei rei

Tournament a lo rei ṭan a, mihring taksa in a tlin loh chin a lo thleng ṭan a, player-te fitness leh tumruhna a pawimawh telh telh dawn. Players pawimawh Adam Zampa (Sunrisers Hyderabad), Lockie Ferguson (Punjab Kings), Glenn Maxwell (Punjab Kings), Vignesh Puthur ( Mumbai Indians) te inhliam avangin kan hmuh tawh hmel loh.

Heng player-te hi theihna nei sangbik an nih avangin an khelhna team theuh te tan chuan an hmun ruak a zau dawn tih a chiang.

Pitch

Khelmual tin pitch te batting nan a la ṭha tlangpui a. Runs pawh an la vaw chhuak hnem narawh e. Chutirual chuan spinner-ten ball an vawm sawt kawi ṭan zeuh zeuh erawh kan lo hmu deuh fur hlawm turah ngai ang. Batter leh bowler te inbeihna balance tak a awm chho ṭan turah ngai ila.

Amaherawhchu tunge playoff lut tur team pali i rin te tiin min zawt leh ta pawh nise, ka chhana a la ngai reng. Ka hre lo.