James awmna Lakers an tla

NBA playoff aṭangin Los Angeles Lakers an tla a, an thiampuipa LeBron James chuan season tharah basketball inelna lian leh ngaihhlut ber hi a khel chhunzawm thei dawn em tih a sawi chiang thei lo.

Nimin zing khan Lakers hian Minnesota Timberwolves chu 103-96 in an ngam lo a, best of seven series khelh turah Timberwolves hi 4-1 a chakin conference semifinal an lut chiang ta a ni.

LeBron James-a'n kum 40 a tling tawh a, professional basketball a khelh zat pawh season 22 a tling tawh! Crypto.com Arena-a an chak loh hnuah James chuan, "Kan chhungkua kan in rawn khawm ang a, ka nupui leh ṭhahnem min ngaihpui em em tu te nen kan sawi ho ang.

"Engtiang chena rei nge ka khelh chhunzawm theih dawn tih hi keimah chauha thutlukna siam chi niah ka ngai lo," a ti a, a chawl dawn emaw a khelh zel dawn emaw pawh ni se hmanhmawh loin thutlukna a siam ang.

NBA huanga point nei tam ber James hian kum 2024 khan Lakers tan hian season hnih daih contract a ziak, an inremna chuan season thar hi a la dauh, mahse chawlh an hman laiin a hma hun a ngaihtuah ṭha dawn a ni.

Lakers hnehtu Timberwolves hian Western Conference semifinal-ah chuan Golden State Warriors leh Houston Rockets te inkhela chak zawk an hmachhawn leh ang a, tlang tur zawk erawh a la chiang lo.

Nimin zing khan Rockets hian an beiseina chhi nung turin Golden State hi 131-116 in an hneh, best of seven series khelh turah Golden State hian 3-2 in hma an la hruai, tlang turin vawi khat chak an la mamawh.

May 3, Inrinni zing dar 6:30 hian game 6 an khel leh dawn - Rockets tan inhamtang turin chak ngei ngei an ngai, an chak loh chuan an zinkawng a tawp ang, an chak a nih erawh chuan game 7 hmanga tlang tur chinfel a ngai dawn a ni.