Champion lai hnehtu Khawbel

EverHome Pro Volleyball League a hmuhnawm nghal a, champion lai Hunthar chu team thar Khawbel lakah 25-21, 25-20, 25-23 (3-0) in an chak lo! Khabel hian zaninah an match hnihna atan Sihphir an hmachhawn lehnghal ang.

Nilaini zan khan LPS Arena, Falkland Vengah league round khelh niin, Khawbel tan Ashwal Rai a langsar hle. Ani hian point 32 hlak chhuakin vawi hnih chiah a tisual a, a phu ang ngeiin Kuriz Player of the Match atan thlan a ni.

Khawbel hian kum 2017 leh 2018 a Hunthar lo champion pui tawhtu, coach ṭha Vanlalmawia chu team enkawl turin an ruai a, ani hian a team hlui a la hrechiang a, tun dinhmuna a player neihte a hman thiam avangin mipui hmuhnawm tih chi an ni chho dawn niin a lang.

A tir aṭangin Khawbelin hma an hruai a, Lianlunsanga Vaiphei leh Ashwal chuan vaw tla zawnin 8-4-in an sangnghal. Karnataka aṭanga an lak luh India international hian a ball hmuh na taka vaw kher lo in awmze nei takin a vaw keuh ṭhin.

Huntharin Anurag Rawat a chungah rinna an nghat lian a, ani hian season hmasa khan a champion pui. Mahse, kumin an match hmasa berah an mamawh tawk point a hlap chhuak zo lo a, match hnihnaah ṭha lehzual zawka a khelh a ngai dawn.

Set hnihnaah a hma aiin Khawbelin inkhel an thunun hneh a, Ashwal chuan a vuak tlak mai bakah net bulah lehlam hlap a dang hnem a, mimala a elpui Anurag-a vuak a dan tlak rualin 12-7-in hma an hruai. Huntharin an hnaih zo lo tluan a, point ngaa inthlau chungin Khawbelin set an la zawn.

Set thumnaah Hunthar in thapui an thawh, set lak ngei tumin an nawr leh nasa. Anurag-a'n a hnung leh hma aṭangin point a thawh hlawk a, Rohluzuala'n thlawp bawkin 22-19-in an sang hman.

Mahse, boruak sangah Ashwal chu Khawbel tan rawn ding chhuakin, a vuak tlak zawn hnuah ṭha taka a service an la thei lo zawn leh a, point khat hmuh belha chak thei turin 24-22-in an lehpel a, an chungnung zui ta a ni.

Zaninah Khawbel hian anmahni ang bawka team thar Sihphir an hmachhawn ang. Inrinni zanah Huntharin anni ang bawka bulṭan fuh lo leh Tuichangral laka tlawm tawh Thutak Nunpuitu Team an tum ve thung dawn a ni.