MPL U17 final-ah Aizawl FC vs Chanmari FC

Mizoram Premier League Under 17 semifinal chu nimin khan RG Stadium-ah khelh a ni a, league-a pakhatna Aizawl FC leh pahnihna Chanmari FC ten final an lut. Nomawi inchuhna hi vawiin chawhnu dar 2:00 hian RG Stadium-ah khelh a ni dawn a, Zonet Rihnim leh YouTube-ah pek chhuah a ni ang.

AFC an ṭha

Kumin MPL Under 17 dana a lan danin semifinal-ah pakhatna leh pathumna inkhelh tur a ni a, league-a pakhatna nih hlutna a tam lo. Chuti chung chuan Aizawl FC an buai phah lo a, nimin khan SYS FC 3-1 in an hneh.

AFC tan Francis Lalhruaizela'n minute 34-naah freekick aṭangin a khung a, SYS lamin first half tawp hma hretin Henry Lalhnehzova hmangin an sut. Second half-ah Aizawl FC-in goal an khung hmasa leh a, Lalhruaitluanga'n minute 63-naah box chhung chiah aṭangin ball kal lai chu mawi zetin a volley goal.

SYS an fimkhur tawk lo a, defender back pass sual chu Aizawl FC forward C. Lalkhawngaiha'n changin box pawn aṭangin kawh zetin a pet goal. Aizawl FC-in goal thum an khung a, SYS-in an chhanglet thei tawh lo. League round-ah Aizawl FC-in SYS an hneh lo a, semifinal-ah an hneh thung.

CFC an chak

Chanmari FC-in league round-a an hneh tawh Saikhamakawn lakah bul an ṭan ṭha. Minute sarihnaah Lalthantluanga'n box chhungah rilru fim puin cool zetin goal hmahruai a khung. Goal hnihna a mawi lehzual a, minute 21-naah F.Laldinsanga'n box pawn aṭangin goal kilah mawi zetin a khung.

Goal hnih chhuah hnuah Saikhamakawn an tlawm duh lo a, minute 23-naah Lunkhosei Haokip hmangin siphurh an sut ṭhen a, minute 43-naah Francis Malsawmkima'n six yard box aṭangin a back volley goal. Francis-a hian hmun chep leh hun tlem te chhungin thutlukna a siam rang hle.

Team pahnih an inhnehtawk a, minute 80-naah Chanmariin siphurh an sut. Laldinsanga'n box pawn aṭangin goal ban a pet per a, hemi per hi Raphael Laltlanhlua'n hnai tak aṭangin a khung. Chanmari hian goal venghim chhunzawmin Saikhamakawn lakah 3-2 in hnehna an chang.

League round-ah Aizawl FC hian Chanmari FC 4-1 in an hneh a, final-ah Chanmari FC-in Aizawl FC lakah phuba lak an tum ang. An senior team-in season tharah I League an khel ve ve dawn a, hei hian tun ṭuma an inkhel turah pawh chak châkna a tuh lehzual ang.