Super Cup final-ah Goa leh Jamshedpur

AIFF Super Cup final-a intawng tur pawh a chiang ta - FC Goa chuan final lut tur hian Mohun Bagan chu 3-1 in an hneh a, Jamshedpur chuan Lallianzuala Chhangte captain-na hnuaia khel Mumbai City chu 1-0 in an hneh bawk.

Mohun Bagan-in Indian Super League-ah Shield leh Cup an lak kawp avangin Super Cup an ngaihlu tawk lo a, an player langsar leh coach te chawlh hahdamna hun pein, Odisha-a inkhelah player langsar zin an awm lo nual.

Mizo midfielder ṭha Lalengmawia Ralte (Apuia) pawh Super Cup khel zingah a tel lo a, Goa erawhin nomawi chawi ngei tumin inelna an hmachhawn thung - Brison Fernandes chuan minute 20-na lekah goal hmahruai khungin, Bagan hian minute thum hnuah Shail Bhat hmangin an sut zui.

Mahse, team ṭha zawk Goan club hi second half-ah an insiamrem leh vat a, minute 51-naah Iker Guarrotxena chuan penalty hmangin hmahruai nawnna goal a khung - Bagan keeper Dheeraj Singh chuan Serbian winger Dejan Drazic chu titluin, penalty hi a chawi a, Guarrotxena hian tun inelnaa a goal lina ni turin a khung.

Goa hian duhtawk mai loin, Borja Herrera chuan a khung belh ve leh a, goal dang lut tawh loin, 3-1 in hnehna an chang - Manolo Marquez enkawlna hnuaia an tournament hnuhnung ber a ni tawh a, nomawi chawi ngei an tum ang.

Hetihlai hian semifinal inkhel dangah Jamshedpur FC chuan 1-0 in Mumbai City an hneh bawk a, Men of Steel tan Rei Tachikawa chuan minute 87-naah chakna goal a khung - Khalid Jamil-a'n season duhawm a hman chhunzawm zel.

Mumbai tan LZ-a'n JFC an hmachhawn hmain goal thum ngawt a khung a, Khalid-a team lakah erawh Lunglei tlangvalin a khung thei bik lo. Lallianzuala Chhangte hian goal khungna remchang neih mah se, a vanneih zan a ni lo a, Mumbai club a chakpui zo ta lo.

LZa chuan, "Hun tawp dawnah goal kan chhuah a, a uiawm takzet. Goal venhim kan tum lutuk kha kan tuar ta niin ka hria a, huaisen takin nawr nghal ila chuan hun pangngaiah kan chak theih ka ring," tiin Vanglaini a hrilh.

Lunglei tlangval chuan a season hman dan thlirletin, "Ka duhthusam season ka hmang lo, season hmasaa ka goal khung leh assist ang zat ka nei lo a, ka ui hle. Season chhia a ni lo a, amaherawhchu team anga chet ṭhat loh chuan lungawi a har a ni," a ti.

Lianzuala hian season hmasa khan ISL Cup nomawi chawiin, Mumbai tan match 34-ah goal 11 a khung a, assist vawi sarih a nei a, tun season-ah match 26 khela goal kua khungin, assist vawi li a nei thung.

Nilaini zana semifinal inkhelah hian Mumbai tan Mizo pathum ngawtin inkhel bul an ṭan a, Lianzuala bakah defender Hmingthanmawia Ralte (Valpuia) leh striker Daniel Lalhlimpuia ten inkhel bul an ṭan a, an vanneih zan erawh a ni ta lo a ni.

Durtlang tlangval Valpuia tan Mumbai a pan hnua match 50 a khelh tlinna chiah a ni a, Aizawl FC leh Punjab FC fullback hlui hian hetih chhung hian ISL, AFC Champions League, AFC Cup, Durand Cup leh Super Cup te a khel hman a, ISL Shield vawi khat lakpuiin, ISL Cup-ah vawi hnih a champion pui bawk.

Hetihlai hian Jamshedpur coach Khalid Jamil chu Aizawl FC tan I League nomawi ropui taka a chawi hnuah a vawi khat nana nomawi chawi leh thei dinhmunah a ding mek - AFC a chhuahsan hnuah Khalid hian East Bengal, Mohun Bagan, NorthEast United, Bengaluru United leh Jamshedpur a enkawl leh tawh.

Super Cup-ah hian champion team-in cheng nuai 25 an dawng ang a, final-a chak lo zawkin nuai 15 an dawng dawn thung.