Champion châk Moises Caicedo

Chelsea midfielder Moises Caicedo chuan Conference League champion nih a chak thu a sawi, zanin dar 12:30 hian semifinal first leg khel turin Djurgarden an lenchilh ang.

Blues midfielder Caicedo chuan, "Conference League champion kan nih theih chuan ka ngaihlu ngawt ang, a chhan chu player zawng zawng hian European title neih hi kan duh, keimah ang bawkin Chelsea player dangte pawhin an duh ve bawk.

"Nomawi hi awlsam taka lak mai theih erawh a ni dawn lo, kan theihna leh thiamna zawng zawng kan hlan a ngai dawn. Mi te chuan chak tura rinkai zawk tiin min sawi a ni mai thei, sawi lawk vek theih erawh a ni bik lo.

"Djurgarden hi team ṭha tak an ni a, anmahni mualah bik phei chuan an khawng lehzual," tiin fimkhur a ngaih tur thu a sawi. Caicedo hian Chelsea player ni chunga Champions League champion nih a chak thu a sawi tawh ṭhin a, tunah erawh Conference League aṭangin bul a ṭan a ngai.

Swedish club Djurgarden hian UEFA competition hnuaiah English club an la hmachhawn ngai lo, tun ṭum hi a vawi khatna tur a nih avangin sawi lawk thiam a harsa, coach Enzo Maresca-a'n a player ṭha a hmang ang tih erawh a sawi lawk theih thung.