YMA hian Zofate hmasawnna tur a ngaihtuah - President, CYMA

LBS Suzuki 22nd Inter Branch YMA Football Tournament 2025 chu Thawhlehni zan khan CYMA Hall, Tuikhuahtlangah CYMA president Lalhmachhuana'n a pet hawng. Pet hawnnah hian CYMA President chuan YMA hian a din tirh aṭanga tun thlengin Zofate hmasawnna tur a ngaihtuah tih a sawi.

Mizorama football inelna ngaihhlut CYMA Football hi May 6, Thawhlehni aṭangin ground pali RG Stadium, 1st Bn MAP Ground, Chite Veng Playground leh Muallungthuah te khelh a ni dawn. Tun ṭum inelnaah hian team 154 telin CYMA Football inelnaa team tel tam ber dawttu a ni.

Team 154 zinga team 69 hi Aizawl khaw chhung niin team 85 hi Aizawl khaw pawn a ni a, team 16 zetin Aizawl khaw pawn an tam zawk. Chutihrualin CYMA Football-ah Aizawl khaw pawn aṭangin Lengpui chiah an la champion a, kum 2006 hnuah inelna hi ṭum riat neih ni leh tawh mah se Aizawl khaw pawn aṭanga champion an awm tawh lo.

Tun ṭum inelna hi Mizoram Football Association leh CYMA buatsaih a ni a, pawl pahnih hian CYMA Football an ngaihlu dun hle. MFA honorary secrertary Lalrengpuia chuan, "CYMA Football hlut dan hi sawi thiam a har. Champion branch ten an ngaihhlut dan leh a chak loten an lak nat dan aṭang hian a chiang berin ka hria. Talent hai chhuah kawngah he inelna hian player ṭha eng emaw zat a lo chher chhuak tawh a, hei hi a pawimawh takzet a ni," tiin a sawi a, Mizo footballer ṭhahnem tak chher chhuaktu a nih thu a sawi tel bawk.