Nomawi la beisei United leh Spurs

Manchester United leh Tottenham Hotspur te Premier League-ah che chhe mah se Europa League-ah nomawi an la beisei. Zanin dar 12:30 hian semifinal khelh a ni dawn a, Man United-in khualmualah Athletic Bilbao an tlawh ang a, Spurs-in Bodo/Glimt an mikhual thung ang.

Spurs boss Ange Postecoglou chuan, "Semifinal kan thlen avangin player-te ka chhuang a, kan hna erawh a la zo," tiin a sawi a, kum 1984-a UEFA Cup nomawi an chawi hnuah Europe inelnaah nomawi chawi an inbeisei hle. English club hi Bodo/Glimt laka chungnung tura rin an ni.

Man United-in Europa League-a hneh loh an la tawng lo a, mahse an inkhelhna tur San Mames hi Athletic Bilbao khelmual ni ringawt loin an kulhpui a ni. Bilbao hian tun season Europa League match rukah vawi ruk an chak a, goal 14 khungin goal hnih chiah an chhuah. Ernesto Valverde hoten an mualah Ruben Amorim-a hote hneh ngei an tum dawn a ni.