Tuichangral an chak nghal

EverHome Pro Volleyball League chu Thawhlehni zan khan khelh ṭan a ni a, match hmasa berah Tuichangral chuan Thutak Nunpuitu Team (TNT) chu 20-25, 25-23, 25-21, 25-22 (3-1) a hnehin inelna bul an ṭan fuh hle.

LPS Arena, Falkland Vengah mipui an pungkhawm hnem a, Tuichangral hian MVA Cup final-a an ngam loh TNT chhangletin set an hloh hmasak hnuah TNT an hneh let a, tualchhung volleyball inelna sangah hian a vawi khat nan champion an tum ngam tih chu a takin an lantir.

Tuichangral an chak theih nan Rajneesh Singh a langsar hle a, point 35 tehmeuh a hlap chhuak - an chak theihna hnar a ni. Mahse, Rajneesh Singh hi Uttar Pradesh-ah a kir leh nghal a ngai dawn a, PVL khel turin a rawn chho leh thei dawn em tih a chiang ta lo.

Rajneesh Singh bakah hian Chirag Yadav, Tanish Choudhary leh Sonu te an ziaklut sa tho a, anni zinga ṭang hian an duh ber an la chahlut thei dawn tho tihna a ni a, coach ṭha David Aizampuia Fanai leh a nauten buaina an nei lo tura ngaih a ni.

MVA Cup champion TNT hi Mizo hlanga khel awmchhun an ni a, an player ṭhate chhawr thei mah se match hmasa ber chu harsa an ti - Zosangzuala'n point 16 hmuin a hmu tam ber a, mahse an chak nen a tawk zo lo.

PVL mipa league round hmasa April 29 aṭanga May 1 zan thum chhung chu a hmunah a thlawnin a duh apiang tan a en theih a; round hnihna May 2, Zirtawpni zan aṭangin ticket zawrh chhuah a ni tawh thung ang.

Nizan khan champion lai Hunthar leh team thar Khawbel te an inhmachhawn a, result kan hre hman lo. Zanin hian a hmun ngaiah Sihphir leh Anastasia Electric Veng te an inhmachhawn dawn a, inkhel a hmuhnawm ang.

Pro Volleyball-a an tel vawi khatna turah Sihphirin a tikimtu nih ringawt an tum lo a, Indian Navy player Niyas Addul Salam an la lut a, thlaveng atan Javed Khan an be fel bawk.

Sihphir coach Lalchhuangliana chuan, "PVL awm tawha team hrang hrang an intluktlan ber a nih ka ring. TNT chu team ṭha sa an ni a, team dangah state pawn atangin player ṭha tak tak an la lut a, tute mah hi hneh awlsam an awm lo ang," a ti.

Anastasia hi PVL champion hmasa ber an ni a, tun ṭumah hian playoff aṭangin an in beng tling leh a ni. NIS coach PC Lalhriatpuia an ruai a, kum ruk hnuah Pro Volleyball-ah kir lehin an tel rau rau a nih chuan champion ngei an duh leh ang.

Electric Veng club hian Laldensanga bakah R Lalhriatrenga, Helly Vanlalliana leh player beiseiawm tak tak an kawl a, tawnhriat nei an kawl bakah player chhuak thar beiseiawm an kawl avangin team ṭha dang tana zuam sual theih tur an ni.