An mualah Arsenal an tlawm

Real Madrid an hneh avanga phur tak Arsenal chuan Paris Saint Germain an lo mikhual a, Paris club lakah 1-0 in an chak lo - goal awmchhun hi Ousmane Dembele-a'n minute lina leka a khung a ni.

Gunners tan Champions League final luh beiseina a tawp nghal tihna erawh a ni lo. May 7, Nilaini zan hian semifinal second leg an khel leh dawn, an intawn lehna tur erawh Paris khawpui a nih tawh dawn avangin hna a hautak ang.

Hrem vangin Thomas Partey a inlan thei lo a, coach Mikel Arteta-a'n midfield laia awm turin Mikel Merino a pawt let a, mual laiah Declan Rice nen an inkawp - Spanish club lian an hneh ṭuma midfield an thunun ang khan an khel thei lo.

Luis Enrique-a nauten inringtawk takin ball an inpe kual a, defender hnen aṭanga a ball hmuh chu Dembele-a'n a lakluh hnuah a sira awm Khvicha Kvaratskhelia tan a pe; Georgian forward hian inringtawk taka a insiamrenpui hnuah Dembele tan bawk a pe kir a, ani hian laklawh nei miah loin a hlap lut.

Goal an phurh hnuah Arsenal lamin an nawr let na hle, mahse, Gabriel Martinelli, Leandro Trossard leh Bukayo Saka te chuan Gianluigi Donnarumma an paltlang thei lo. Italy international goalkeeper hian an lama lut tur a lo dang chat chat zel a ni.

Mikel Merino-a tauh luh chu VAR hmanga ennawn a nih hnuah offside vanga hnawlsak a ni a, hun tawp dawna Martinelli-a'n sang taka a thlawh chhuah chu an ui khawp ang. PSG forward Goncalo Ramos-a'n bar a pet per avangin Gunners lamin si an phurh belh lo hlauh bawk.

Inkhelh ṭan hmain Rice-a'n ball chan tam an mamawh thu a sawi a, a takah an ti thei lo. PSG thiampuipa Vitinha chu midfield roreltu zawk a ni a, an intawn leh hunah pawh ani ven dan hi North London club lamin an ngaihven a ngai ang.

Arteta chuan, "Champions League final luh kan duh a nih chuan, thil mak danglam tak kan tih theih a ngai," tiin a sawi a, Paris khawpuiah thil mak tih theih a inbeisei thu a sawi bawk a ni.

PSG manager Enrique chuan, "Emirates Stadium boruak awmdan tur kha kan hrethiam a, chutiang karah chuan kan zia dik tak kan chhuah thei. Hei erawh kan hriat a ngai, second leg kan khelh tur hi tun aiin a hautak ang," tiin a ṭawng fimkhur hle.